UKRAINË– Ukraina ka hyrë në ditën e 13 të luftës dhe kur koha kalon, palët sa vijnë dhe nuk heqin dorë nga kërkesat e tyre. Kievi nuk heq dorë nga mbrojtja, e ndërsa Moska ka shtuar kërcënimet deri në realizimin e kërkesave të tyre që janë të qarta: për të anuluar pushtimin, kërkon që Ukraina të ndryshojë kushtetutën e saj për të garantuar se nuk do të bashkohet me NATO-n dhe BE-në. Nëse kjo nuk ndodh, lufta do të vijojë, teksa bisedimet për korridoret humanitare vijojnë dhe pritet që raundi i katërt i bisedimeve të zhvillohet të martën. Nga ana tjetër, Moska ka kërcënuar se mund të hakmerret kundër sanksioneve evropiane duke ndërprerë gazin natyror.
Ndërkohë gjatë natës kanë vijuar bombardimet, ku Rusia ka sulmuar një pikë evakuimi të civilëve jashtë Kievit, duke vrarë 8 persona, përfshirë 2 fëmijë , teksa ata u përpoqën të largoheshin nga shtëpitë e tyre. Frika po rritet për civilët e bllokuar në qytetet e Mariupol, Volnovakha dhe Kiev ndërsa sulmi rus vazhdon. Presidenti ukrainas Volodymyr Zelensky beson se presidenti amerikan Joe Biden “mund të bëjë më shumë” për të ndaluar luftën. “Unë jam i sigurt se ai mund dhe unë do të doja ta besoja këtë. Ai është i aftë ta bëjë këtë,” tha Zelensky, teksa përsëriti kërkesën për të mbyllur hapësirën ajrore të Ukrainës.
“Nëse një raketë fluturon lart, Unë mendoj se nuk ka përgjigje tjetër … ata duhet të rrëzohen. Ju duhet të ruani jetë,” tha ai.
Zelensky ka pasur edhe një mesazh të fortë duke thënë se për shumë persona lufta mund të duket e largët, por tha se nga “etja” e Putin gjasat janë që të mos shpëtojë askush. “Të gjithë mendojnë se jemi shumë larg Amerikës apo Kanadasë. Jo, ne jemi në këtë zonë lirie. Dhe kur kufijtë e të drejtave dhe lirive shkelen dhe shkelen, atëherë ju duhet të na mbroni. Sepse ne do të jemi të parët. Ju do të vini i dyti, sepse sa më shumë të hajë kjo bishë, ai do më shumë, më shumë dhe më shumë”, përfundoi Zelensky.
