Djali 5-vjeçar i Arjan Salës, heroit që humbi jetën rreth një vit më parë nga flakët për të shpëtuar kolegët e tij, është marrë nën përkujdesjen e shtetit. Këtë të mërkurë 5-vjeçari mori statusin “Fëmijë në përkujdesje të Republikës’, në ceremoninë e zhvilluar në Kryeministri për një periudhë 20-vjeçare.
Gjatë fjalës së tij kreu i qeverisë Edi Rama vlerësoi edhe njëherë aktin dhe shembullin dinjitoz të Arjan Salës.
“Ideja për ta ndërmarrë këtë nismë më ka lindur kur kam vizituar familjen e Arjan Salës, për faktin se dha jetën për të shpëtuar kushedi sesa të tjerë. Sapo kam dal prej aty, kam kontaktuar menjëherë Ogertën dhe të tjerët kemi filluar punën, për ta ngritur në mënyrë domethënëse mbështetjen e fëmijëve. E quajta amanet të heshtur, pasi ishte nja amanet që u tha pa fjalë nga ata që nuk janë më, një amanet të pathënë nga Arjan Sala në shtëpinë e tij kur ai mungonte. Sot i japim Aronit, djalit 5-vjeçar të Arjanit, për 20 vitet e ardhshme”, tha Rama.
Pak muaj më parë, Arjan Sala u shpall shpallur ‘Dëshmor i Atdheut’. Qendra tregtare ku punonte i riu u përfshi nga flakët marsin e 2021, ndërsa flakët u vunë nën kontroll pas tre ditësh. Nga hetimet paraprake dyshohet se qendra tregtare u përfshi nga flakët për shkak të një shkëndije elektrike. I riu humbi jetën nga asfiksia.
