BRITANI E MADHE– Dukesha e Cambridge, Kate Middleton, vetëizolohet në shtëpi. Sipas një burimi të CBS News , bëhet e ditur se Kate, Dukesha e Cambridge është vetëizoluar pasi ka qenë në kontakt me një person, i cili më pas ka rezultuar pozitiv ndaj CoronaVirus-it. Burimi shton se Dukesha gëzon shëndet të plotë dhe deri tani nuk po përjeton asnjë simptomë të Covid.
“Dukesha nuk ka asnjë simptomë, por po ndjek të gjitha udhëzimet përkatëse të qeverisë dhe është vetë izoluar në shtëpi”, tha një zëdhënës i Pallatit Kensington.
Javën e shkuar, Kate ka marrë pjesë në kampionation europian te futbollit, gjithashtu dhe në turneun e tenisit Wimbledon, ku të dyja testet paraprake të Covid i kanë rezultuar negative. Familja mbretërore testohet ndaj Covid dy herë në javë, pjesë kjo e një regjimi të vendosur nga vetë ata.
Por, pas shfaqjes së saj në publik ditën e premte në Wimbledon, Dukesha i është nënshtruar vetëizolimit. Sipas BBC News, ajo është ulur pranë Dukës së Kent në pozicionet e përcaktuara për familjen mbretërore dhe ka ndjekur me rigorozitet rregullat mbi mbajtjen e maskës ne Wimbledon. Pas ndeshjes, Kate ka takuar stafin e Wimbledon në muzeun e stadiumit.
Këtë javë, ajo do të ishte pjesë e një eventi të mbajtur me rastin e 73-vjetorit të shërbimit mjekësor britanik së bashku me Princin William, të cilit nuk i është kërkuar të vetë-izolohet. Dukesha e Cambridge i ka marrë të dyja dozat e vaksinës së Covid-19. Princi William, i cili dhe ai i ka marrë të dyja dozat e vaksinës, e ka kaluar Covid në Prill të 2020.
Edhe pjesëtarë të tjerë të familjes mbretërore i kanë marrë të dyja dozat e vaksinës, përfshi këtu edhe 95-vjeçaren, mbretëreshën Elizabeth. Mbretëresha është shprehur se procedura e vaksinimit ishte e shpejtë dhe pa dhimbje, ndërkohë që inkurajon publikun të ndjekin rregullat dhe të mendojnë edhe për të tjerët.
