Kreu i Urgjencës Kombëtare, Skënder Brataj, i ftuar në ‘Real Story’ mbrëmjen e sotme, tha se pas gjysmës së parë të muajit maj pritet që të ketë rritje të rasteve me Covid-19, pasi përkon me fushatën elektorale që u zhvillua në muajin prill.
Brataj bëri një interpretim të kurbës së shifrave, të shtrimeve në spital dhe të rasteve me koronavirus. Ai tha se ka pasur rritje të thirrjeve tek numri 127, kryesisht në lidhje me efektet e vaksinës.
Këtë fakt e konfirmoi edhe Drejtori i Spitalit Covid-2, Perlat Kapisyzi, i cili tha se është rritur numri i shtrimeve në spital: “Këto 3-4 ditë ka një rritje të shtrimeve. E shoh nga numri i urgjenave që shtrohen. Duke qenë se një pjesë janë mosha jo të avancuara, dhe ditëqëndrimi është më i vogël në krahasim me shkurtin, apo nëntorin e dhjetorin”.
“Pati një rritje të telefonatave tek 127. E pashë që ishin informacionet rreth efekteve të vaksinës, që kërkonin ndihmë. Kishin efekte anësore, dhimbje trupi. Ishte një seri thirrjesh. Unë ndjek shtrimet në spital. Ne jemi barometri i situatës për shtrimet në spital, bëj çdo ditë indeksin. Shoh nëse më shumë dalin apo hyjnë. Në dhjetor dilnin më shumë sesa hynin. Kemi asistuar 1370 pacientë. Numri nuk është se ka qenë kaq i pakët” – tha Brataj duke shtuar më tej:
Nëse sot kemi 53 raste, nuk ka shumë kërkesa për teste, pasi edhe njerëzit që kanë shenja të lehta thonë se mund të kenë rrufë. Këtë vit, në krahasim me vitet e kaluara, ka infeksione respiratore. Kjo hapja shton edhe sëmundjet e tjera. Interpretimi i këtyre gjërave është dhe nuk është realitet. Por nëse njerëzit nuk kërkojnë, nuk ke si ta vërtetosh.
