Ajo njihet për karakterin e fortë dhe forcën e saj e ka shfaqur disa herë edhe në performancat e saj në skenë, por Aurela Gaçe zbuloi për herë të parë se e vetmja gjë që e bën atë të ndihet e dobët janë vajzat dhe familja e saj.
E tillë është edhe historia që ka ndarë me ndjekësit, e ftuar së fundmi në emisionin “E ardhmja është vajzë”, artistja tregoi diçka më shumë rreth karrierës, magjisë në skenë dhe jetës së saj private.
“Shumë i dhimbshëm ka qenë udhëtimi im i parë, pasi kam lindur Grace-in. Ka qenë një udhëtim që le të themi ‘e kam larë’ me lot derisa jam kthyer. Më është dashur të shkoja në Amerikë, kisha rreth një vit që e kisha bërë kontratën. Grace-i ishte vetëm 40 ditëshe. Në 40 ditët e para unë isha e operuar, nuk ishte e lehtë të vishje takat, të dukeshe mirë dhe sa më pyesnin si është vajza përlotesha.” u shpreh Gaçe.
Ky ishte një nga rrëfimet e rrallë që ka bërë Aurela dhe ndër më të veçantët.
