E gjithë bota e sportit ka dënuar pushtimin rus të Ukrainës, duke marrë masa të menjëhershme. Pas heqjes së finales së Champions nga Shën Petersburgu, përjashtimit të Rusisë nga Botërori 2022 në Katar dhe vendimit që nuk lejon skuadrat ruse nga kupat e Europës, vendime të ngjashme ka marrë Formula 1, basketbolli, tenisi dhe të gjithë sportet e tjerë.
Çmimi i Madh i Soçit në Formula 1 nuk do të zhvillohet. Drejtuesit e cirkusit vendosën që të heqin nga kalendari garën në Rusi, e parashikuar në fundjavën e 25 shtatorit. Në këtë mënyrë, Botërori do të ketë 22 gara. Federata e Basketbollit vendosi të pezullojë të gjitha skuadrat ruse nga turnetë e Euroligës dhe Eurokupës, duke njoftuar se do të monitorojë me kujdes situatën. Nëse lufta nuk përfundon, ekipet ruse do të përjashtohen dhe ndeshjet e tyre do të anulohen për efekt të klasifikimit.
Federata Ndërkombëtare e Tenisit anuloi me kohë të pacaktuar turnetë në Rusi. Vendim të njëjtë mori Noti me Botërorin e të rinjve në Kazan dhe Gjimnastika që fshiu nga kalendari eventet në këtë vend. Olimpiada e shahut, një lloj Botërori ku marrin pjesë mijëra shahistë nga 180 shtete nuk do të zhvillohet në Rusi. Gjithashtu janë anuluar edhe garat e skive deri në fund të sezonit.
World Rugby vendosi të përjashtojë Rusinë dhe Bjellorusinë nga të gjitha aktivitetet, teksa Federata e patinazhit i ndaloi sportistëve rusë dhe bjellorusë pjesëmarrjen në eventet ndërkombëtare. Në Botërorin e skermës në Kajro, ekipi ukrainas refuzoi të ngjitej në pedanë kundër Rusisë, me sportistët që shpalosën banerin “Ndaloni luftën, shpëtoni Ukrainën”.
Duke qenë se vendimet e sporteve individuale janë më komplekse, Komiteti Olimpik Ndërkombëtar i rekomandoi federatave sportive të lënë jashtë garave ndërkombëtare sportistët rusë dhe bjellorusë. Akuza mbi Rusinë është ajo e thyerjes së paqes olimpike pas sulmeve në Ukrainë.
