Tiranë- Vrasja e efektivit të policisë, Roland Bicerrit nga djali i mitur tronditi kryeqytetin këtë të dielë. Ngjarja aksidentale që i mori jetën efektivit të policisë.
Shoku i Roland Bicerrit përmes një postimi në Facebook ka treguar momentet e fundit me shokun e tij para se të vdiste.
“‘Ke filluar të merresh me politikë’, më tha kur na u bashkua në kafe. Tre herë u bëra gati të ikja se më prisnin dhe tre herë më mbajti me zor se donte të luanim. Kam 20 vjet që luaj bilardo, gati përditë, por hera e fundit ishte dje me të.
Lojën që na e la përgjysmë ajo krisëm, do ta mbarojmë një ditë kur ta takoj, dhe deri atëherë nuk do luaj më me asnjë. Ishte djalë kampion. Ishte aq krenar saqë dhe kur ulej në karrige e kishte për zor, se e mbante trupin drejtë e gjoksin para dhe nuk i ulej askujt. Nuk ma mori mendja se do gjunjëzohej një ditë para meje dhe Klajdit. Para se të binte në duart tona më pa në sy, moment që s’do ta harroj sa të kem jetë. Dhe pse ia ndjeja duart e ftohta, kisha shpresa se do jetonte.
Deri kur më tha doktori ‘JO’, isha i bindur se ishte gjallë. Më “mashtroi” disa herë sepse po reagonte dhe mendova se po më dëgjonte dhe po luftonte me vdekjen, por ai po nxirrte frymën e fundit. Shpirti iu prehtë në paqe dhe i dhëntë forcë familjes Bicerri. Djali i tyre do të na mungojë të gjithëve, me shakatë e tij dhe gatishmërinë e pashoq për të bërë vetëm ndere. Nuk prishi kurrë qejf me asnjë. Qofsh i Parajsës komshi, mik o shok”, shkruan ai.
