Masakra e ndodhur ditën e djeshme në Elbasan, la pas një të vdekur dhe katër persona të plagosur pas një konflikti të ndodhur për shkak të fushatës elektorale. Pjerin Xhuvani ka ndërruar jetë pas tre plumbave që mori në kokë nga ish- efektivi i forcave RENEA, Arbër Papleka. Personat e tjerë që mbetën të plagosur janë: ish-polici Emiljan Prenga 39 vjeç, person me precedent penalë; Pavlo Vuksani 50 vjeç, ish-efektiv i policisë kriminale; Eltjon Bodinaku 32 vjeç (dhëndrri i viktimës) si dhe efektivja e forcave “Shqiponja”, Xhensila Sota 27 vjeçe.
Paplekaj është dorëzuar pak orë pas ngjarjes te kolegët e tij. Në dëshminë e dhënë ai ka bërë të ditur se ka qëlluar në kushtet e vetëmbrojtjes pasi grupi me të cilin ishte i shoqëruar Xhuvani, ishin të armatosur.
Hetimet për ngjarjen e rëndë ende vijojnë. 15 persona janë shoqëruar në komisariat, aty ku janë marrë në pyetje për ngjarjen e rëndë që ka ndodhur. Në mesin e tyre janë dhe banorë të lagjes apo kalimtarë të rastësishëm që janë gjendur aty. Mirëpo, raportohet se në mesin e tyre ka dhe persona që mund të ndalohen pasi kanë qënë të përfshirë në ngjarje.
Ndërkohë pas marrjes në pyetje të të shoqëruarve, policia ka rindërtuar dhe një herë skemën e ngjarjes. Dyshohet se të shtënat kanë ardhur nga dy pistoleta të ndryshme, dhe se ngjarja është zhvilluar në pak sekonda. Policia ka gjetur 18 gëzhoja plumbash të kalibrit 9 mm dhe 11 mm.
Drejtori i Përgjithshëm i policisë së shtetit Ardi Veliu dhe Tonin Vocaj kanë shkuar sërish ditën e sotme në Elbasan. Ata ndodhen në vendin ku ditën e djeshme u ekzekutua Pjerin Xhuvani.
Aktualisht në gjendje të rëndë vijon të mbetet dhëndri i viktimës, Eltjon Bodinaku. Sipas ‘Balkanweb’, 32-vjeçari është aktualisht në terapi intensive pas plagëve të marra. Po ashtu, mësohet se efektivja e forcave “Shqiponja”, Xhensila Sota, i është nënshtruar një operacioni në këmbë ku dhe kishte marrë plumbin. Sa i përket dy personave të tjerë që janë plagosur, Emiljan Prenga dhe Pavlo Vuksani janë jashtë rrezikut për jetën dhe po marrin trajtim në spitalin e Traumës. I plagosur ka mbetur dhe Klemend Xhaferrin, i cili u largua nga vendi i ngjarjes dhe tashmë është i shpallur në kërkim nga policia.
Hetimet ende vijojnë për të bërë të mundur zbardhjen e plotë.
