KOSOVË-Dy persona janë gjetur të pajetë në Prizren. Sipas mediave të Kosovës, bëhet e ditur se personat e gjetur janë babë dhe bijë. Sakaq, sipas njoftimit të policisë, është konfirmuar se burri është një zyrtar policie me iniciale S.M, rreth 50 vjeç, ndërsa vajza e tij B.M. është rreth 20 vjeç.
Sipas mediave të Kosovës, deri më tani dyshohet se burri ka përdorur armën e shërbimit për të vrarë vajzën e tij e më pas veten. Zëdhënësi i policisë, Baki Kelani, ka konfirmuar se ngjarja ka ndodhur sot pas orës 19:00.
“Me 15.12.2020, pak pas orës 19:00, Policia ka pranuar një informacion se në rrugën “Durmish Asllani” në Prizren, janë dëgjuar të shtëna nga arma e zjarrit. Njësitet kompetente policore, menjëherë i janë përgjigjur vendit të ngjarjes dhe bazuar në informacionet e para, në një shtëpi banimi janë gjetur dy trupa të pa jetë, një M/Kosovar zyrtar policor dhe një F/Kosovare, vdekjen e të cilëve e kanë konfirmuar mjekët kompetent. Në vendin e ngjarjes kanë shkuar të gjitha njësitet policore përfshirë forenzikën, ekipet mjekësore dhe prokurorin, të cilët janë duke ekzaminuar vendin e ngjarjes si dhe duke kryer hetime intensive, lidhur me rastin”, ka thënë Kelani.
