LEZHË- Xhulio Prela, 26 vjeç, me detyrë efektiv i Policisë së Shtetit pranë repartit të Forcave të Ndërhyrjes së Shpejtë në Shkodër, është vrarë pas mesnate në Lezhë, në zonën e njohur si “Gajush”. Prela, një polic i ri, me 2 vite eksperiencë, një vit në Lezhë e më pas është transferuar në Shkodër është ekzekutuar me armë zjarri, ndërsa një plumb që ka marrë pranë zemrës i ka marrë jetën.
Prela është gjetur i vrarë në Gajush rreth orës 3 të mëngjesit, ndërsa trupi është dërguar në morgun e spitalit rajonal të Lezhës, ku i është nënshtruar ekzaminimit të mëtejshëm.
Fillimisht policia ka dyshuar se bëhej fjalë për vetëvrasje, por nga kqyrja e plagëve është parë se efektivi është qëlluar për vdekje dhe më pas ka humbur edhe kontrollin e mjetit tip Volksëagen që po drejtohej prej tij dhe ka dalë nga rruga.
Sipas burimeve i riu nuk ka patur asnjë konflikt personal të mëparshëm dhe paraprakisht dyshohet se ngjarja lidhet me probleme të ndryshme gjatë ushtrimit të detyrës.
Policia ndërkohë ka rënë në gjurmët e autorëve. Ata dyshohet se janë larguar me një kamion të verdhë nga vendngjarja ndërsa përgjatë natës janë ngritur pika kontrolli për kapjen e tyre.
