Banesa e biznesmenit Nazmi Çangu ka rënë pre e grabitjes në orët e para të mëngjesit. Policia bën me dije se persona të paidentifikuar ende janë futur në banesën e Çangut, ku përmes dhunës kanë vjedhur një shumë parash.
Pasi Çangu ka rënë pa ndjenja, grabitësit kanë marrë nga banesa 8 mijë euro dhe çdo gjë tjetër që ka qenë në kasafortë, përfshirë edhe flori. Vlera totale e sendeve dhe parave që kanë marrë nga banesa përllogaritet deri në 100 mijë euro. Çangu ka mundur të dallojë që njëri nga grabitësit ka qenë i veshur me uniformë policie.
Ai është dërguar në spital ku aktualisht ndodhet jashtë rrezikut për jetën. Çangu ka një biznes në fushën e mobilerisë në Krujë, por nuk njihet si problematik në zonë dhe nuk ka pasur konflikte në të shkuarën.
Tashmë policia dhe grupi hetimor po punojnë për zbardhjen e plotë të kësaj ngjarje si dhe identifikimin dhe prangosjen e autorëve të grabitjes.
“Më datë 24.10.2021, gjatë orëve të para të mëngjesit të sotëm, persona ende të paidentifikuar, kanë vjedhur me dhunë një shumë parash në banesën e shtetasit N. Ç. Shërbimet e Policisë dhe grupi hetimor, po punojnë intensivisht nën drejtimin e Prokurorisë Rrethit Gjyqësor Krujë për zbardhjen e ngjarjes, identifikimin dhe kapjen e autorëve”, njofton policia.
