Deputeti i Partisë Socialiste Vullnet Sinaj ka uruar të gjitha gratë shqiptare me rastin e festës së 8 Marsit.
Nëpërmjet një postimi në rrjete sociale, Sinaj ka gjetur një mënyrë tepër të veçantë për të uruar këtë ditë. Me anë të një fotografie ai ka shkeputur një moment tepër të veçantë të ditës së tij, foton me nënën e tij të shtrenjtë, zonjën Lefteri, një grua e forte, të cilën deputeti e quan “keshilltare të jetës” së tij.
Duke uruar dhe falenderuar të gjitha gratë që çdo ditë mbajnë në këmbë familjet e tyre, punojnë në punë të ndryshme dhe luftojnë çdo ditë për të drejtat personale e profesionale, deputeti Sinaj shkruan:
“Tek pi kafen e mëngjesit 
të përgatitur nga duart e nënës, mendja më shkon në fëmijërinë time. 
Nuk më hiqet nga mendja insistimi i saj për arsimimin tonë 
, nxitja për nota të shkëlqyera dhe përpjekjet e sakrificat me të cilat na rriti dhe na shkolloi dy motrat, vëllain dhe mua. Kjo grua 87-vjeçare, bijë e vërtetë e Labërisë, mbesë e “Nderit të Kombit” Memo Meto, është këshilltarja e jetës sime. 
Sot, në Ditën e Gruas e urova dhe e falenderova nënën time, Lefterinë që vazhdon të jetë jo vetëm heroina ime, por edhe e nipave dhe mbesave të veta. 
Shembujt e grave të forta nuk i kanë munguar kurrë vendit tonë. Urime grave që çdo ditë mbajnë në këmbë familjet e tyre, punojnë në punë të ndryshme dhe luftojnë çdo ditë për të drejtat personale e profesionale. Urime edhe atyre që për arsye të ndryshme kalojnë vështirësi të paimagjinueshme, si dhuna në familje, pabarazia në vendet ku punojnë ose detyrimi të rrisin të vetme fëmijët e tyre. Sot nderojmë burimin e jetës, respektojmë nënat, gratë, motrat e vajzat tona, të cilat janë motiv i ekzistencës për këdo nga ne. 
Gëzuar 8 Marsin, grave të Vlorës dhe gjithë Shqipërisë! 
“
