Presidenti Ilir Meta ka bërë me dije se nuk do të marrë pjesë në mbledhjen e sotme të Komisionit Hetimor që është ngritur për shkarkimin e tij. Paraditen e sotme, kreu i shtetit i ka bërë thirrje Komisionit që të ndalojë procesin që sipas tij është i palegjitimuar dhe jashtë afatit për të vepruar. Me anë të një shkrese zyrtare, kreu i shtetit në plot 28 faqe ka arsyetuar veprimet e tij duke i cilësuar si legjitime për mbrojtjen e rendit dhe Kushtetutës në vend gjatë zgjedhjeve parlamentare.
“Ndaj i bëj thirrje këtij Kuvendi, – me 0 (zero) opozitë, dhe pa asnjë forcë opozitare brenda tij, siç e konfirmuan dhe vet zgjedhjet e 25 prillit; – që ka njollosur parlamentarizmin si asnjë Kuvend tjetër më parë; – që vuri dorë me vetëdije mbi zgjedhjet e 25 prillit, duke nisur me dhunimin e njëanshëm të marrëveshjes së 5 qershorit, e deri te miratimet e njëanshme si kurrë ndonjëherë në historinë e vendit, të ndryshimeve të Kushtetutës dhe të Kodit Zgjedhor; – që harxhoi dy vite me fyerje, sharje, shpifje, hetime ndaj Presidentit, të bëra direkt nga podiumi ku duhej të uleshin përfaqësuesit e denjë të sovranit; – që i ka humbur të tëra betejat me Presidentin e Republikës, edhe pse ka qenë i vetmi institucion në mbrojtje të Kushtetutës e rendit kushtetues; se, duhet ta ketë të qartë që askush, brenda dhe jashtë vendit, nuk mund të gënjehet e mashtrohet se kjo është çështje “etike” dhe “retorike”. Jo! Edhe pse kjo nismë është një hakmarrje, ju garantoj se, Presidenti i Republikës, ishte dhe do të mbetet i vetmi institucion që nuk e frikësuat, që nuk e korruptuat, dhe që nuk e detyruat asnjëherë, që të shkelte Kushtetutën e Republikës së Shqipërisë,”-shkruan Meta.
