Gjykata e Tiranës ka rrëzuar FSHF-në dhe ka regjistruar si drejtues të shoqatës rajonale të kryeqytetit, Eduard Prodanin. Vendimi është marrë ditën e sotme, ku u njoh Asambleja e zhvilluar nga Erion Veliaj, në cilësinë e aksionerit të klubit të Tiranës.
Veliaj paditi për shpërdorim të detyrës, falsifikim të dokumenteve dhe rrjetit kompjuterik drejtuesit e Federatës Shqiptare të Futbollit. Në cilësinë e aksionerit te Klubit të Futbollit Tirana, Veliaj akuzoi Ilir Shulkun, me detyrë Sekretar i Përgjithshëm i Federatë Shqiptare të Futbollit dhe Ardian Haçin, me detyrë Sekretar i Përgjithshëm i Shoqatës Rajonale të Futbollit Tiranë, se kanë manipuluar në bashkëpunim zgjedhjet për Kreun e Shoqatës Rajonale të Futbollit të Tiranës.
Si ndodhi manipulimi?
Armand Duka ka manipuluar zgjedhjet për kreun e Shoqatës së Futbollit Tirana. Përmes 24 votuesve anonimë, që u futën nga Duka, u arrit që të zgjidhej në krye të kësaj shoqate Krenar Alimehmeti, i vetëm në garë pasi kandidati tjetër Eduard Prodani u tërhoq pak pas nisjes së mbledhjes. Në sallë kishte 67 anëtarë nga 41 që duhet të ishin, ku 24 janë persona anonimë të shtuar nga Duka dhe jo delegatë legjitim. Ndërsa vetë Eduard Prodani dhe 18 mbështetësit e tij u larguan pak para fillimit të mbledhjes.
Kandidati i Dukës, Alimehmeti sipas FSHF u zgjodh me 44 vota pro, 2 ishin vota për Edi Prodani dhe 1 abstenim. Eduard Prodani u tërhoq nga gara bashkë me 18 nga mbështetësit e tij që u larguan nga salla dhe akuzoi Armand Dukën se ka shtuar si votues 20 persona anonimë dhe me këto anonimët ka bërë kuorumin për të votuar Krenar Alimehmetin dhe imponuar qëndrimin e tij.
Përfaqësuesit e shoqatave të Tiranës deklaruan se FSHF ka prodhuar lista fiktive votuesish në momentin e fundit, duke falsifikuar listat e votuesve, një akt i dënueshëm penalisht.
Lajm në përditësim
