Gjyqtarja Enkeleda Kapedani, të cilës i dolën video nga jeta private në “Tik Tok”, është përlotur sot para KLGJ-së ku u shpreh se është bërë “kokë turku” me qëllim dëmtimin e imazhit të saj si grua e nënë, si dhe shkatërrimin e karrierës profesionale.
Ndërsa u shpreh se ka paraqitur dorëheqjen nga pozicioni i zëvendës-kryetares së Gjykatës së Elbasanit, Kapedani vuri në dukje se edhe gjyqtarë dhe prokurorë të tjerë kanë rrjete sociale ku publikojnë mbi jetën private.
E prekur, Kapedani tha se reagime të tilla si në rastin e saj nuk ka pasur nga publiku dhe institucionet as kur kanë dalë raste gjyqtarësh të korruptuar apo shkelje të tjera.
“Shumica e kolegëve, gjyqtarë dhe prokurorë kanë rrjete sociale, si Facebook, Instagram, Tik Tok, Twitter etj, në të cilat publikojnë foto dhe video nga jeta e tyre private, shtëpi, lokale, makinë, plazh. Pse isha pikërisht unë e goditura, kë kam shkelur unë në kallo?! Ka ndonjë interes që unë të mos jem në krye të Gjykatës së Elbasanit, apo gjyqtare e kësaj gjykate?! Rrugën e kujt po pengon unë?! Kam të drejtë të pyes, si shumë pikëpyetje më lindin nga kjo situatë e stisur dhe e qëllimshme ndaj meje.
Është e qartë se kjo situatë mori përmasa të tilla pasi ka qenë e qëllimshme, jo vetëm për të dëmtuar imazhin tim si femër, si motër, si vajzë, si nënë dhe si grua, por kryesisht në karrierën time profesionale. Të tilla reagime në media, publiku dhe institucionet nuk kanë pasur as kur gjyqtarët janë ndaluar për kryerjen e një vepre penale, apo korrupsion. Çfarë veprimi kaq denigures ishte duke u shfaqur në video? Mos ndoshta isha duke kryer veprime të pahijshme në drejtim të dosjes, pelerinës, sallës së gjykimit apo ndonjë element tjetër që lidhet me profesionin? Mos vallë isha duke konsumuar cigare, alkool, drogë, apo ndonjë lëndë tjetër?
Mos isha duke takuar palë, avokatë, apo ndonjë akt korruptiv? Përgjigjja është jo. Nëse unë Enkeleda Kapedani jam druri i shtrembër në sistemin e drejtësisë atëherë, përse atëherë asnjëherë nuk më është gjetur shkelje në dosje. Ndaj u deshën video jashtë orarit të punës për të shkatërruar gjithçka timen, për të më shkatërruar mua si nënë si grua. Jam e bindur që e vërteta do dalë në dritë, që do provohet që u bëra “kokë turku” e atyre që nëpërmjet meje nuk arritën qëllimet e tyre. I lutem KLGJ të gjykojë gjakftohtë. Mos lejoni që ethet e klikimeve dhe bota e klikimit të fitojë mbi një gjyqtare që ka dhënë jetën dhe ka vendosur punën mbi familjen”, tha Kapedani.
“Përpos kësaj, në situatën e vështirë ku ndodhem dhe për ti lënë rrugë të hapur hetimit kam paraqitur një kërkesë për dorëheqjen nga pozicioni i zëvendës-kryetares së Gjykatës së Elbasanit”, shtoi ai
