GJIROKASTËR– Një grup alpinistësh mbetën të bllokuar për orë të tëra në majë të malit të Murganës pranë kufirit me Greqinë. Një prej pjesëtarëve të grupit, 17-vjeçari Ergys Koçi u rrëzua nga një lartësi duke thyer këmbën, duke bllokuar kështu edhe 20 personat e tjerë që e shoqëronin në udhëtim.
Të bllokuar në majë të malit dhe me një të lënduar që nuk mund të ecte, alpinistët kanë telefonuar Policinë duke kërkuar ndihmë nga ajri. Pas marrjes së sinjalit efektivë të forcave “Shqiponja”, bashkë me banorë të zonës u ngjitën në lartësinë rreth 1200 metra për t’u ardhur në ndihmë alpinistëve, duke i zbritur me sukses në fshat.
Ndërkohë alpinistët kanë dhënë një version tjetër lidhur me çfarë ka ndodhur ditën e sotme pranë kufirit me shtetin grek. Ata janë shprehur se edhe pse kishin njoftuar dhe kishin kërkuar ndihmë, nuk u ishte ofruar. Alpinistët pohojnë se ishin vetë alpinistët e Gjirokastrës, ata që bënë të mundur transportin e të riut nëpër humnera dhe terrene mjaft të vështira.
17-vjeçari me këmbë të thyer është dërguar për në spital për të marrë mjekimin e duhur, dhe deri tani nuk ka shfaqur probleme të tjera veç frakturave, ndërsa të tjerët janë në gjendje të mirë dhe jashtë rrezikut për jetën.
