Studentët francezë kanë planifikuar një seri protestash për të tërhequr vëmendjen në rritjen e problemeve të shëndetit mendor që shumë thonë se po vuajnë si rezultat i pandemisë së koronavirusit.
Një kombinim i izolimit, pasivitetit dhe një humbjeje më të gjerë të qëllimit ka lënë shumë studentë pesimistë, sipas psikologëve.
Burimet e shëndetit mendor të studentëve thonë se kanë qenë të mbushur me telefonata të rinjsh që kërkojnë ndihmë.
Si në shumë vende, studentët në Francë nuk kanë qenë në gjendje të marrin pjesë në leksione për disa muaj, dhe shumë prej tyre po jetojnë larg shtëpisë në strehime me kushte jo të mira.
Mbyllja e kafeneve, bareve, kinemave dhe palestrave do të thotë se ka pak hapësirë për socializim apo veprimtari të tjera. Për më tepër, që nga e shtuna e kaluar, e gjithë Franca është nën një shtetrrethim që fillon çdo ditë në orën 18:00.
Të rinjtë e moshave 19-20 vjeç tregojnë se po kalojnë vështirësi dhe nga bisedat me njëri-tjetrin kuptojnë se nuk janë vetëm në këtë “luftë” me shëndetin mendor.
Këta të rinj kanë krijuar hashtagun #GhostStudents (student fantazma), një term që ata krijuan për të reflektuar sesi studentët ndihen të injoruar nga qeveria.
Heïdi Soupault, një studente e shkencave politike nga Strasburgu, vendosi t’i shkruajë një letër presidentit Emmanuel Macron javën e kaluar.
“Jam 19 vjeç dhe ndihem si e vdekur. Nuk kam më ëndrra. Nëse nuk kemi asnjë shpresë ose perspektivë për të ardhmen në moshën 19-vjeçare, çfarë na mbetet?”
Letra e saj u shpërnda gjerësisht në rrjete sociale, dhe shumë studentë u përgjigjën me ndjenja të ngjashme të tyre.
Presidenti Macron, megjithatë, i kërkoi zonjushës Soupault dhe studentëve në një pozitë të ngjashme të këmbëngulnin.
“Është e vështirë të jesh 20 vjeç në vitin 2020,” shkroi ai në përgjigjen e tij, duke risjellë një rresht nga një fjalim që bëri tetorin e kaluar. “Vazhdoni të duroni … Ne e dimë se çfarë ju detyrohemi. Unë po ju kërkoj edhe një përpjekje.”
