Pas përfundimit të procesit të gjatë të votimit të anëtarësisë për përzgjedhjen e kandidatëve për deputetë, lista finale e të cilëve do të përzgjidhet nga kryesia, Partia Demokratike ka nisur konsultimet për një tjetër çështje të rëndësishme: Zgjedhjen e drejtuesve politikë në qarqe.
Prej disa ditësh në selinë blu po diskutohen emrat e mundshëm që do të drejtojnë fushatën elektorale në të 12 qarqet e vendit, por me gjasë vendimi final do të kërkojë kohë, pasi Partisë Demokratike do ti duhet t’i bëjë mirë kalkulimet pas 7 vitesh e gjysmë në opozitë.
Burime te Alba News brenda selisë blu, saktësuan disa nga emrat më të diskutuar në të 12 qarqet e vendit. Suprizë janë diskutimet, që kryedemokrati Basha të lërë Tiranën dhe të rikthehet në Elbasan aty ku u zgjodh deputet ne vitin 2009, dhe arriti një ndër rezultatet me historike, duke marrë 7 nga 14 mandatet. Po aq suprizë është edhe fakti për të vendosur drejtues politik të Shkodrës ish-kryeministrin Sali Berisha, qark ku pritet të kandidoje edhe ish-bashkëpuntorja e tij e ngushtë Jozefina Topalli, e cila vetëm pak ditë më parë zyrtarizoi lëvizjen politike.
Në Durrës, përballë kryeministrit Edi Rama ku pritet të jetë edhe beteja më e ashpër, demokratët pritet të caktojë drejtues politik Oerd Bylykbashin, por përflitet edhe emri i Sekretarit të Përgjithshëm Gazment Bardhi. Në Tiranë, përballë Spiropalit, Bushatit dhe Veliajt diskutohet të vendosen Grida Duma, Aldo Bumçi, Flamur Noka dhe Gazment Bardhi.
DREJTUESIT E MUNDSHËM TË QARQEVE NË PD:
Elbasan-Lulzim Basha
Shkodër- Sali Berisha
Lezhë- Alfred Rushaj
Kukës- Edi Paloka
Dibër- Dhurata Çupi
Korçë- Edmond Spaho
Gjirokastër- Genc Pollo
Durrës – Oerd Bylykbashi
Tiranë- Gazmend Bardhi (por emri i tij diskutohet edhe për Qarkun e Durrësit) Grida Duma, Aldo Bumci, Flamur Noka
Vlorë- Bujar Leskaj
Berat-Tomorr Alizoti
Fier- Enkelejd Alibeaj
Megjithatë,vetë kreu i demokratëve, ka deklaruar se emrat do të bëhen publikë sapo të merret vendimi.
