DURRËS– Një tjetër sasi e konsiderueshme droge është kapur në Portin e Durrësit mbrëmjen e kësaj të mërkure. Report Tv mëson se bëhet fjalë për 45.5 kg kokainë e ndarë në 40 pako. Sasia e drogës ishte fshehur në një konteiner që vinte nga Brazili, i ngarkuar me mish pule. Nga burimet, raportohet se porositësi i mishit është një biznes nga Maqedonia e Veriut, teksa janë ndaluar 2 persona, shtetas kosovarë, shoferi dhe një përfaqësues i firmës. Ato janë ndaluar për t’u marrë në pyetje nga uniformat blu, dëshmia e të cilëve mund të ndihmojë grupin hetimor për të zbardhur të plotë ngjarjen.
Droga mendohet se kishte dy porositës, kjo për shkak se edhe pakot ishin të ndara, me imazhe të ndryshme, por që si personazh kryesor kishin protagonistin e filmit të animuar “Goku” dhe “Budën”. Secila pako peshonte nga 800-1400 gramë.
Nuk dihet nëse në këtë operacion “Tranzit” kanë qenë të përfshira edhe partnerët ndërkombëtar që mund të kenë sinjalizuar për sasinë e drogës, siç ka ndodhur edhe në aksionet e tjera të kryera. Gjithashtu të pakta janë edhe detajet mbi intenerarin që ka ndjekur ky konteiner, vendi ku është ngarkuar sasia e drogës si edhe destinacioni përfundimtar i saj deri te porositësit e vërtetë. Sa i përket këtyre të fundit, nuk ka asnjë informacion.
Kjo është sasia e dytë e cila është kapur brenda një kohe të shkurt, brenda pak javësh në Portin e Durrësit. Vetëm pak javë më parë, u kap një tjetër sasi kokaine në një anije me qymyr e cila vinte nga Kolumbia. Kokaina u gjet në hambarin e anijes “Unistream” me flamur të Antigua Barbuda nga Ishujt Karaibe. Ajo ishte e ndarë në 53 pako, në 2 çanta dhe bëhej fjalë për 59 kg. Të arrestuar nuk pati asnjë.
