Kolegji Zgjedhor është tërhequr dhe ka marrë një vendim për fatin e Fletës së Votimit, për zgjedhjet e 25 prillit. Trupa e përbërë nga Gentjan Medja, Alma Kolgjoka, Manjola Xhaxho, Esmeralda Xhili dhe Asim Vokshi është mbledhur në orën 16:00 dhe pas tërheqjes ka vendosur që fleta e votimit të jetë vetëm me numra.
Në sallë kanë marrë fjalën përfaqësuesit e partive, si dhe ka pasur debate mes tyre. Ivi Kaso, përfaqësuesi i PD-së ka deklaruar se padia e tyre ka të bëjë me identifikimin e emrave të kandidatëve në fletët e votimit, pra, ata janë të mendimit që fleta e votimit të jetë me emra. Së dyti, sipas Kasos, padia ka të bëjë me logon e partisë Bindje Demokratike, e cila është mjaft e ngjashme me atë të Partisë Demokratike. Sipas Kasos, ngjashmëri ka modeli i shkronjave dhe ngjyra dhe se BD-së mund t’i hiqet fare logoja.
Këtyre fjalëve u është përgjigjur Fabian Topollaj, përfaqësuesi i Bindjes Demokratike. Sipas Topollajt, logoja mund t’i hiqet PD-AN-së, pasi ata janë një subjekt zgjedhor më i ri se BD-ja. Tobollajt shtoi se janë bërë ndryshime dhe se fletët nuk janë të ngjashme.
Për fletën e votimit ka marrë fjalën edhe përfaqësuesi i Partisë Soicaliste, Eridian Salianji. Ai tha se fleta e votimit me numra është e duhura pasi ajo me emra ka ngarkesë të madhe dhe ngjan me një gazetë.
PD kërkon anulimin e fletës së votimit me numra dhe rikthimin e fletës ku shënohen emrat e kandidatëve. Ankimimi i demokratëve erdhi pas vendimit të Komisionit të Ankimimit dhe Ankesave (KAS), që pranoi kërkesën e PS-së për fletë me numra, duke rrëzuar propozimin e PD-së që kishte marrë më parë “OK”-in në KQZ.
Fleta e votimit me emra u propozua nga Ilirjan Celibashi, por më pas u ankimua nga 2 forcat kryesore politike. Në fletën e miratuar ishte parashikuar të shënuar emrat e kandidatëve për deputetë dhe jo me numra.
Maratona e zgjedhjes së një formati për fletën e votimit, vijon prej javësh. Disa ditë më parë fleta e votimit me emra u propozua nga Ilirjan Celibashi dhe kaloi me vota në KQZ, por u ankimua nga të dyja palët si PS, ashtu edhe PD. PS kërkonte numrat para emrave, ndërsa PD fletë votimi horizontale. Tanimë “sytë” janë kthyer nga Kolegji për të vendosur se cila nga variantet e propozuara do të përdoret për zgjedhjet parlamentare.
