TIRANË– Akademia e Shkencave (ASH) publikoi në ditët festive një studim për imunitetin ndaj virusit cov-sars 2, duke dhënë shifra mbresëlënëse. Nga studimi i qendrave shëndetësore në Tiranë, prej 200 mijë banorëve,. 48.5 për qind e tyre, ose 97 mijë, e kanë kaluar Covid 19 duke u klasifikuar si të imunizuar.
Kjo shifër është përdorur si matës për nivelin e imunitetit të tufës, që dr. Genc Sulçebe e vlerëson rreth 50 për qind në Tiranë. Kjo do të thotë që rreth 50 për qind e banorëve të Tiranës, pra rreth 400 mijë vetë, e kanë kaluar Covid-19 me ose pa simptoma dhe tani kanë imunitet ndaj tij. Lajmi më i mirë është që kjo ndërpret në masë të madhe zinxhirin e transmetimit, me 50 për qind. Nëse transmetueshmëria ka qene 1 me 1 këtë periudhë, sipas studimit, duhet të kishim hyrë në një periudhë të re, ku transmetueshmëria është 0.5, gjë që do të shënonte një hap të madh drejt normalitetit.
Me shifrat e Akademisë së Shkencave, duhet që masat shtrënguese të hiqen dhe jeta të kthehej në normalitet, me masa më të lehta, si distance, maskat dhe dezinfektimi. Vendimmarrja i takon Komitetit Teknik. Megjithëse ka dyshime të forta se Komiteti në fakt është maska anti-covid e Edi Ramës, të dhënat ku bazohet vendimmarrja e tyre janë ato të ISHP.
Kështu nëse sipas Akademisë së Shkencave, vetëm në Tiranë janë 400 mijë banorë me imunitet, sipas ISHP në gjithë vendin që nga nisja e pandemisë janë 58 mijë nga 262 mijë testimet e bëra. Sigurisht që nuk është testuar gjithkush, por ka një të dhënë tjetër që e vë në dyshim studimin e ASH. Numri i pozitivëve në krahasim me atë të testeve është akoma shumë i lartë, pra transmetueshmëria nuk duket se ka rënë. Në 2400 teste të 31 dhjetorit 2020, dalin pozitivë 589 persona vetë, ose më shumë se 20 për qind.
Kjo shifër e lartë flet për nivel maksimal të rrezikut dhe justifikon masat shtrënguese, edhe më shumë se sa janë tani.
Megjithatë, Komiteti Teknik, ndryshe nga Akademia, nuk ka asnjë të dhënë të përafërt për imunitetin e tufës. Qeveria aq më pak, megjithëse mund të ballafaqonte të dhënat nga të gjitha burimet. Derisa qeveria të ndërtojë një matricë dhe të ketë një database të plotë për situatën, studimi i Akademisë së Shkencave do të jetë vetëm një kuriozitet dhe masat do të merren me nevojën, intuitën apo humorin e Kryeministrit.
Dosja.al
