Tiranë- Kuvendi nisi seancën ditën e sotme duke përkujtuar dhe nderuar 51 viktimat e tërmetit të 26 nëntorit 2019 me një minutë heshtje.
Kryetari i Kuvendit, Gramoz Ruëi në fjalën e mbajtur inkurajoi qeverinë që të realizojë objektivat e Rindërtimit të dëmtimeve të tërmetit të 26 nëntorit.
Ai garantoi se procesi për të rikthyer të gjithë qytetarët e pastrehë nga tërmeti në banesa të reja as nuk është ndaluar, dhe as do të ndalohet madje as nga pandemia.
FJALA E GRAMOZ RUÇIT
Zonja dhe zotërinj deputetë,
Si sot, një vit më parë, Shqipëria u godit nga tërmeti më i fuqishëm i dyzetë viteve të fundit.
Durrësi, Thumana, Tirana, Laçi Lezha ishin zonat më të goditura.
51 jetë njerëzore u humbën dhe mbi tre mijë njerëz u plagosën. Disa mijra familje mbetën të pastreha.
Në shenjë dhimbjeje e respekti për 51 qytetarët që humbën jetën nga tërmeti, ju ftoj të mbajmë një minutë heshtje.
Pushofshin në paqe!
Të nderuar kolegë,
Tërmetit të 26 nëntorit, kësaj goditjeje natyrore iu kundërpërgjigj një solidaritet i fuqishëm njerëzor. Qindra mijra qytetarë kontribuan me sa mundën për të lehtësuar barrën e përballimit të pasojave të tërmetit.
Sfida e qytetarëve po mund sfidën e natyrës. Përgjigja e Qeverisë e institucioneve edhe solidariteti i qytetarëve shqiptarë inspiruan mbështetjen e fuqishme ndërkombëtare.
Konferenca e donatorëve e shkurtit 2020, me moton “Bashkë për Shqipërinë”, mobilizoi për rindërtimin një ndihmë jashtë çdo parashikimi: 1.15 miliardë Euro, prej të cilave 300 milion dhuratë.
Përpjekjet tona për rikthimin e qytetarëve në shtëpitë e tyre të rindërtuara apo të reja, nuk u ndalën, nga pandemia e Covid-19, e cila shpërtheu në kulmin e rindërtimit. Kuvendi inkurajon punën e Qeverisë për realizimin e objektivave të rindërtimit edhe në kushtet e kostove që imponoi pandemia.
Fuqia, shpresa dhe besimi janë më të mëdha se goditja e tërmetit e ankthi prej pandemisë. Solidariteti e dashuria njerëzore prodhojnë rezultate më të mira se ndarja e konfliktet.
Ju faleminderit.
