TIRANË– Sot në Kuvend do të zhvillohet seanca e dytë plenare për shqyrtimin e projektligjeve dhe buxhetin e shtetit të vitit 2023. Seanca e një dite më parë u shoqërua me debate dhe përplasje mes mazhorancës dhe opozitës. Përgjatë seancës maratonë që kaloi mbi 12 orë diskutime në Kuvend, kryeministri Rama garantoi se buxheti 2023 do të ndihmojë financiarisht çdo shtresë vunerabël. Rama theksoi se do të rritet paga e zjarrfikësve, punonjësve të arsimit, shëndetësisë dhe ushtarakëve.
Më në detaje, përmes shifrave, situatën ekonomike e pasqyroi ministrja e Ekonomisë Delina Ibrahimaj, e cila teksa foli për paketën fiskale tha se vetëm këtij viti janë çelur 5600 biznese të reja. Por krejt ndryshe, e sheh tablonë opozita, sipas së cilës buxheti për 2023 është buxhet varfërie.
Debatit, orët e pasdites, kur parlamenti ishte thuajse e boshatisur prej deputetëve, të cilët pasi mbaronin fjalimet, braktisnin sallën, iu bashkua edhe ish kryeministri Sali Berisha. Për të buxheti është katastrofë! Edhe për Monika Kryemadhin, deputeten e Partisë së Lirisë, paratë nuk po shpërndahen te qytetarët, por aferat korruptive.
Të ardhurat në vendin tonë për vitin 2023 parashikohet të jetë në nivelin 631. 7 miliard lekë, ku 475 miliard lekë të ardhura do të vijnë nga qeverisja qendrore, ndërsa 65 584 milionë lekë nga pushteti lokal.
Fokus të veçantë në buxhet pritet të ketë sektori energjetik, ku parashikohet fondi prej 12 miliardë lekësh. Po ashtu është parashikuar një fond prej 2. 3 miliardë lekësh që të përdoret për politika të reja pagash. Viti 2023 është vit zgjedhor dhe fondi i parashikuar për këtë qëllim është 1. 8 miliardë lekë.
