Zelanda e Re është bërë vendi i dytë pas Indisë që ka mundësuar lejen për gratë që pësojnë një abort spontan ose humbasin një fëmijë gjatë lindjes. Më 24 mars, parlamenti i vendit miratoi legjislacionin duke u dhënë grave dhe partnerëve të tyre të drejtën për leje me pagesë në rast të një aborti spontan.
Tani, punonjësit mund të përfitojnë nga leja 3-ditore nëse një shtatzëni përfundon me abort. Këto pushime do të jenë të ndryshme nga pushimet e zakonshme për punonjësit.
Dispozitat e pushimit janë të vlefshme për nënat, partnerët e tyre, si dhe prindërit që planifikojnë të kenë një fëmijë përmes surrogacisë ose birësimit. Deputetja e Partisë së Punës, Ginny Andersen, e cila nisi projekt-ligjin, tha se 1 në 4 gra në Zelandën e Re pëson një abort spontan.
Zelanda e Re shihet si pioniere për sa i përket të drejtave të grave dhe çështjeve përkatëse. Në fakt, Zelanda e Re ishte vendi i parë në botë që u dha të drejtën e votës grave.
Qeveria aktuale e Punës drejtohet nga Kryeministrja Jacinda Ardern, e perceptuar si një udhëheqëse globale për gratë. Vitin e kaluar, Zelanda e Re miratoi një ligj historik që dekriminalizoi abortin. India është i vetmi vend tjetër në botë që ofron dispozita të ngjashme për gratë.
