Kriza dhe rritja e çmimeve kanë ngritur qytetarët në këmbë edhe sot kundër qeverisë së kryeminisëtrit Edi Rama. Protesta nisi fillimisht mëngjesin e sotëm në Lushnje, fermerët bllokuan rrugën e njohur si ‘Shesh pushimi i Shoferëve’ mirëpo nuk zgjati shumë pasi ndërhyri Policia. Më pas, protestat nisën edhe në Korçë. Studentët e universitetit ‘Fan Noli’ marshuan në shenjë revolte kundër rritjes së karburantit dhe produkteve të shportës ushqimore. Ata lanë mësimin për t’iu bashkuar thirrjeve të qytetatëve për protestë, ndërsa tubimit të nisur prej tyre iu bashkuan dhe qytetarë të tjerë, e deputetët Edmond Spaho dhe Sotira Koti. Në Fier, po ashtu u zhvilluan protesta
Në orët e para të mëngjesit 70 drejtues të furgonëve që transportojnë nxënësit e shkollave 9-vjeçare dhe të mesme në Fier protestuan para bashkisë. Edhe në Bulqizë qytetarët dolën sot në rrugë me mjetet e tyre duke kundërshtuar rritjen e çmimit të naftës. Në Tiranë, marshimi ka nisur nga studentët e Universitetit Bujqësor të Tiranës. Studentët e UBT janë nisur nga Kamza për të mbullur marshimin në sheshin “Skënderbej”.
Dhe në orën 17:00 ka nisur grumbullimi i qytetarëve përballë Kryeministrisë. Por pas protestave të shumta, ka pasur edhe pasoja. Në total janë të arrestuar 30 persona në disa qytete, 81 të proceduar dhe 17 të shpallur në kërkim, në Tiranë, Durrës, Shkodër, Mirditë dhe Bulqizë. Arrestimet janë kryer pas një vale protestash që kanë shpërthyer në të gjithë vendin. Nafta kapi rekordin mbrëmjen e djeshme ku u regjistrua çmimi rekord prej 290 lekë për litër. Protestat e qytetarëve kanë detyruar shitësit e naftës të bëjnë një reflektim në çmim, ku sot ka nisur rënia. Çmimi për litër sot është 223 lekë të reja.
