Me tone nacionaliste, duke folur për një mision për të shpëtuar Kosovën, pavarësinë e saj dhe sovranitetin e Shqipërisë por edhe me një ‘pagëzim’ të ri si ‘për të larë mëkatët’ Ilir Meta nis sot zyrtarisht rrugëtimin e tij të ri në politikën shqiptare. Lëvizja Socialiste për Integrim nga dita e sotme do të mbajë emrin ‘Partia e Lirisë’. Që në nisje të eventit u ndryshuan 2 nene në statut ku LSI i dha të drejtë vetes që të ndryshojë emrin, vulën dhe simbolet e partisë. Kjo i hapi rrugën ndryshimit të emrit të partisë së krijuar në vitin 2004 nga Ilir Meta. Tashmë Partia e Lirisë do të drejtohet nga një Komitet Organizator, me në krye Ilir Metën, derisa sipas statutit të zhvillohen zgjedhjet që ta ngjisin zyrtarisht ish presidentin në krye të saj.
Për emrin e ri, mund të ketë marrë frymëzim dhe nga Sali Berisha, me të cilin LSI bëri koalicionin që mbante emrin “Shtëpia e Lirisë” dhe u fut në zgjedhjet e pjesshme të 6 marsit. Në Konventën Kombëtare, gjatë fjalimit që zgjati rreth 1 orë, Ilir Meta duket se rikthehet në politikë me kartën e nacionalizmit që siç duket do e shikojmë shpesh ta artikulojë si të vetmen alternativë që i ofron shqiptarëve, të cilëve sot i tha se zgjidhja e vetme është Referendumi. “Kam parë një rrezik kanosës për sovranitetin e këtij vendi, për pavarësinë dhe shtetësinë e Kosovës”, tha Meta duke shtuar se kërkohet ndërhyrje emergjente dhe ka një plan për të ekzekutuar pluralizmin politik në Shqipërisë. Një thirrje e kishte edhe për qytetarët duke i thënë se s’duhet të besojnë asnjë politikan si dhe bëri zotim se tradhtarët do të përballen me shpatën e “Domekleut”.
Ndër të tjera, Meta shprehu edhe shqetësimin për gjendjen e vështirë të vendit dhe renditi të gjitha dështimet e qeverisë Rama, duke nisur nga paga më e ulët në rajon deri te fakti që shqiptarët “mbajnë kampion” për azilantë. Nuk kurseu komentet për kundërshtarët politik, më konkretisht për Edi Ramën, Lulzim Bashën, të cilëve u shpalli luftë për jetë a vdekje. Meta kërkoi që të shpallet “non grata Rilindja mavi dhe blu”. Me këtë të fundit duket se i referohet deputetëve demokratë që mbështesin nismat e qeverisë Rama. Nuk munguan në mesin e anëtarëve të partisë së tij, as thirrja klasike Rama ik.
Meta nuk hezitoi të thoshte atë që mendonte edhe për Lulzim Bashën, të cilin e cilësoi “mashtrues ordiner”. Nga fjala që mbajti u kuptua qartë se Meta ka qenë kundër djegies së mandateve në 2019, gjë që mesa duket ka sjellë prishje të marrëdhënies së tij me ish kryetarin e PD pasi thotë se ishte kategorikisht kundër bastit të çmendur për të lënë parlamentin. Vendimi i Metës për tu rikthyer në politikë nuk është surprizë pasi e kishte paralajmëruar që kur ishte në krye të shtetit. Një ditë pasi la Presidencën, mori frerët e drejtimit të partisë në mënyrë që të sjellë frymë opozitare në vend dhe të rrëzojë Edi Ramën. Ndërsa Monika Kryemadhi, e cila dha dorëheqjen nga posti i kryetares së LSI që nga sot quhet ‘Partia e Lirisë’ për t’ia lënë vendin Ilir Metës, ka zbuluar lëvizjen e radhës duke thënë se do rikthehej te të rinjtë.
Edhe gjatë fundit të mandatit të tij në krye të shtetit, Meta është përplasur vazhdimisht me mazhorancën, e cila madje ndërmori dy herë votimin për shkarkimin e tij nga posti i presidentit. Në qershor të vitit të kaluar Kuvendi votoi për shkarkimin e Metës si president, por Gjykata Kushtetuese vendosi kundër vendimit të marrë.
