Seanca e parashikuar për ditën e enjte në Kuvendin e Shqipërisë nuk do të zhvillohet.
Lajmi bëhet me dije nga Kuvendi, teksa sqarohet se në zbatim të vendimit të Komitetit Teknik të Ekspertëve dhe të urdhrit të ministres së Shëndetësisë dhe Mbrojtjes Shoqërore “Për ndalimin e grumbullimeve në vende të mbyllura apo të hapura”, kryetari i Kuvendit vendosi që të mos zhvillohet seanca plenare e Kuvendit të Shqipërisë, e planifikuar për ditën e enjte, datë 19 nëntor 2020.
“Në respekt të zbatimit të këtyre masave, kryetari i Kuvendit, z. Gramoz Ruçi, i është drejtuar Komitetit Teknik të Ekspertëve dhe Ministres së Shëndetësisë dhe Mbrojtjes Shoqërore, znj. Ogerta Manastirliu, për të bërë një interpretim lidhur me vazhdimin e seancave plenare të Kuvendit.
Puna në komisionet parlamentare vazhdon online”, thuhet më tej në njoftimin e kuvendit.
Një ditë më parë Komiteti Teknik i Ekspertëve mori tre vendime të reja në kuadër të masave anti-COVID:
Të ndalohen grumbullimet me më shumë se 10 persona në vende të hapura dhe të mbyllura.
-Të ndalohen mbledhjet partiake dhe tubimet.
– Konferencat, ceremonitë e festave, ceremonitë martesore dhe organizimet përtej familjare të ceremonive mortore, deri në një urdhër të dytë.
