TIRANË– Kreu i Komanduar i Partisë Demokratike dhe njëkohësisht kryetari i Grupit Parlamentar të PD, Enkelejd Alibeaj do të mbledhë ditën e sotme grupin parlamentar. Mbledhja pritet të nisë në orën 09:00, një orë para seancës plenare në Kuvendin e Shqipërisë.
Mesazhi i kreut të grupit parlamentar, Enkelejd Alibeaj ka mbërritur edhe tek deputetët që janë pjesë e Komisionit të Rithemelimit të Partisë Demokratike të cilët pak muaj më parë u pezulluan për shkak të mbështetjes që treguan ndaj ish-kryeministrit Sali Berisha. Por, ky i fundit është shprehur se ai do të jetë i pari që do të mbërrijë në selinë blu.
Pas mbledhjes me anëtarët e grupit të Rithemelimit që pati një ditë më parë, Berisha tha për mediat se do të marrë pjesë në mbledhjen e nesërme, duke shtuar se njoftimin e ka marrë nga kolegët e tij. Ai shtoi se nuk kishte dijeni lidhur me kushtin e Alibeajt për të mbajtur larg takimit liderin historik të Partisë Demokratike. Pas tij, një reagim ka ardhur nga sekretari i Përgjithshëm, Gazment Bardhi, i cili pretendoi se Berisha po imponohej në mbledhje dhe se kjo sipas tij nuk ishte sjellje demokratike. Sipas tij, një parti ku nuk respektohet vullneti, qëndrimi dhe vlerësimi i Grupit Parlamentar është parti personale, por jo demokratike, duke theksuar se askush nuk mund që të imponohet.
Pjesë e diskutimeve mësohet se do të jetë situata aktuale në PD, pasi gjykata i ka dhënë vulën e selinë Rithemelimit, vendim që pranoi ndryshimet statuore të vulosura më 11 dhjetor të vitit të kaluar dhe riktheu Berishën në selinë blu.
