Emigrantët që tentojnë të shkojnë në Britani mund të akomodohen në një qendër azili në Shqipëri, sipas Daily Mail. Kështu shpresojnë ministrat në Britani, të cilët po diskutojnë hapjen e një qendre azili, e cila besojnë se do të vepronte si një pengesë për emigrantët që kalojnë nga Franca veriore.
Sipas ‘Times’, kushdo që kërkon azil në Britani dhe që mbërrin në rrugë të paligjshme, si me gomone dhe varka të vogla, do të dërgohet në qendrën e re brenda shtatë ditëve dhe gjatë kësaj kohe do të bëhet vlerësimi i kërkesave për azil në Britani. Megjithatë, projekti do t’i kushtonte taksapaguesit britanik 100,000 £ për emigrant për fluturime dhe akomodim.
“Shqipëria nuk do të jetë kurrë nga ato vende që do të ketë kampe emigrantësh.” Kjo ishte përgjigja e kryeministri Edi Rama, për sa i përket lajmit të publikuar nga mediat britanike për negociata mes qeverisë britanike dhe asaj shqiptare, duke e mohuar lajmin. ‘Shqipëria nuk do të jetë kurr një vend ku do të krijojmë kampe emigrantësh.’- tha Rama.
Po ashtu ministrja e Jashtme Olta Xhaçka, thotë se lajmi i publikuar nga mediat britanike se qeveria e Mbretëisë së Bashkuar është në komunikim me qeverinë shqiptare për të ngritur një kamp refugjatësh, është i rremë.
‘I njëjti lajm i rremë, i vjetër, këtë herë në faqen e parë të një gazete të respektuar si The Times! Dhe meqë ra fjala unë nuk jam një “ai” por një “ajo” që gjithmonë e ka admiruar cilësinë e mediave britanike. E trishtë!’– shkruan Xhaçka.
Sipas mediave britanike sërish po zhvillohen bisedime diskrete me qeverinë e Tiranës për ngritjen e një qendre azili. Pas një sërë zhgënjimesh në bisedimet me vendet e tjera për të pritur emigrantët, shpresat e kabinetit për një marrëveshje me Shqipërinë po rriten. “Kjo është shpresa jonë e vetme, pasi asgjë tjetër nuk po funksionon”, tha një ministër i paidentifikuar për gazetën.
