Laç- Kryeministri Edi Rama ka qenë sot në Laç ku ka nisur sot ndërtimi i pallateve të reja në bashkëpunim me qeverinë turke për banorët të cilët humbën banesat nga tërmeti i 26 nëntorit.
Ndërkohë një mesazh përshëndetës ka ardhur nga Turqia, nga vetë presidenti turk, Erdogan, i cili është shprehur gëzimin për nisjen e ndërtimit të pallateve në Laç, si bashkëpunim mes dy vendeve.
Projekti që do të kushtojë plot 42 milionë euro ka ardhur si angazhimi i shtetit turk bahskë me ndihmat e tjera që iu ofruan vendit, menjëherë pas tërmetit që goditi vendin më 26 nëntor vitin e kaluar.
“Përshëndes të gjithë vëllezërit shqiptarë. Shqipëria është miku dhe partneri i afërt i Turqisë në Ballkan. Ne shohim gëzimin e popullit tuaj si gëzimin tonë dhe trishtimin tuaj si trishtimin tonë. Pas tërmetit, ne menjëherë angazhuam mundësitë tona. Ne kemi dërguar 4 kamiona me ndihma humanitare. Ne ndërtuam shtëpi për vëllezërit tanë shqiptarë. Projekti ynë do kushtojë 42 milionë euro. Po ndërtojmë streha të ngrohta për vëllezërit tonë. Shtëpitë do shërbejnë për vëllazërinë tonë Shqipëri – Turqi. Shpreh ngushëllimet e sinqerta për viktimat e tërmetit. Përshëndes edhe kryeministrin Edi Rama”, tha Erdogan.
