Gjiri Durrësit u përfshi nga një mot i paqëndrueshëm me stuhi dhe erëra të forta, që shkaktuan probleme në të gjithë qytetin duke shkatërruar jo vetëm ndërtesa me skelete druri, tenda apo tabelat e reklamave, por edhe hodhi poshtë skelat e pallateve dhe objekteve në ndërtim e sipër.
Për fat të mirë, mësohet se u regjistruan vetëm dëme materiale dhe nuk pati asnjë të lënduar. Për shkak të motit të keq u anuluan tragetet e linjës Durrës-Bari dhe anasjelltas për datat 28 dhe 29 dhjetor, për shkak të erës së fortë dhe detit të trazuar.
SITUATA- Era e fortë nuk ka kursyer as statujën e Redonit, e cila u vendos rreth 1 vit më parë në hyrje të shëtitores “Taulantia”, në lagjen Nr 1 të qytetit. Statuja e Redonit, vepër e artistit të mirënjohur Ilirjan Xhixha, ishte vendosur në një nga sheshet kryesore të Durrësit, si një simbol i fuqisë dhe përkatësisë pellazgo-ilire.
Por era e fortë e kësaj të marte e ka shkëputur një pjesë të skulpturës, pikërisht perëndinë Redon që qëndronte në këmbë mbi kuajt e tij. Me mjetet e ndërmarrjes “Rruga” është bërë spostimi i pjesës së dëmtuar të skulpturës. I gjithi ky proces është monitoruar nga afër nga vetë skulptori Xhixha.
Perëndia Redon është dërguar në një ambient në Shkozet, ku do t’i nënshtrohet riparimeve të nevojshme dhe më pas ai do të instalohet sërish mbi kuajt e tij, në hyrje të shëtitores “Taulantia”.
Moti i keq që përfshiu qytetin e Durrësit ka bërë që shëtitorja “Taulantia” të ishte nën pushtetin e leshterikëve, tendave të thyera dhe skelave të një objekti të shpërndara në shesh. Si pasojë e erërave të forta, dallgët e fuqishme të detit nxorën në zonën e “Sfinksit” grumbujt të mëdhenj leshterikësh.
KAPITENERIA- Drejtoria e Përgjithshme Detare paralajmëroi që moti i përkeqësuar do të shtrihej në gjithë bregdetin tonë deri më datë 30 dhe për këtë arsye do të pezullohen lundrimet e trageteve të linjave Durrës-Bari dhe Anasjelltas, pasi e njëjta situatë paraqitet edhe në bregdetin italian. Si pasojë e motit të keq, shoqëruar me stuhi shiu dhe erë të forta, është urdhëruar që të gjitha mjetet lundruese të ankorohen dhe të mos dalë asnjëra në det.
“Në datën 27-30 dhjetor 2020 moti do të përkeqësohet. Bregdeti ynë do të përfshihet nga era me drejtim jug dhe jug -perendim me shpejtësi që varion nga 10-20m/s dhe forca e detit do të variojë nga 5-8 shkalla bufort, kurse lartësia e dallgës do të jetë 1.50 -2.50 m.Moti i përkeqësuar do të shtrihet në gjithë bregdetin tonë. Me qëllim parandalimin e çdo situate të papritur për shkak të kushteve atmosferike kërkojmë bashkëpunimin e të gjithë subjekteve që ushtrojnë veprimtari në fushën e detarisë, për të marrë të gjitha masat e nevojshme për sigurimin e mjeteve në port dhe rritje e gadishmerisë së ekuipazhit në mjetet lundruese”, thuhej në njoftim.
Kujtojmë që u anuluan tragetet e linjës Durrës-Bari dhe anasjelltas për datat 28 dhe 29 dhjetor, për shkak të erës së fortë dhe detit të trazuar.
