Tiranë- Në një lidhje me “Skype” për emisionin “Real Story”, mbrëmjen e kaluar Xhetan Ndregjoni, daja i Eva dhe Endri Dumanit tha se nuk është e vërtetë që 14-vjeçarja, Eva Dumani nuk ka dashur të vijë, por sipas tij ajo ka pasur frikë dhe presion brenda kampit. Në emision u publikua një bisedë e 14-vjeçares Eva Dumani me dajën e saj, Xhetan Ndregjoni. Në audio dëgjohet e mitura nga kampi i ferrit “Al Hol”, në Siri, që i kërkon dajës të mos ndërhyjë për sjelljen e saj në Shqipëri, pasi një gjë e tillë mund t’i rrezikojë jetë.
Eva: Na lini rehat, të ikim tamam në Shqipëri. Allahu e di nga na çojnë, na shesin. Më mirë rri urtë dhe bëj durim, derisa të vijë shteti e të ikim tamam si gjithë shqiptarët. Na kanë parë neve, na kanë regjistruar dhe na kanë thënë që do na marrin shpejt.
Daja: Thirrja e Evës atje thotë ‘rri urtë o dajë, se po na prish punë, ti nuk e di sa keq është ndërhyrja jote. Me këtë mund të na shesin, mund të na vrasin’.
Daja Ndregjoni theksoi se Eva bëri një zgjedhje mes vetes dhe vëllait, dhe zgjodhi të shpëtojë vëllanë, pasi ishte në gjendje të rëndë dhe nëse do të qëndronte edhe një muaj në atë kamp, nuk do të jetonte më.
“Jam gati të jap gjithçka vetëm të kthej dhe mbesën në atdhe. Nuk ka fjalë për të komentuar pamjet e momentit të takimit të nënës me Endri Dumanit. Ato pamje janë vetëm dhimbje, që na kanë shoqëruar neve prej vitesh. Shoh që qarkullon se nuk ka dashur Eva të kthehet. Eva është 14 vjeçe, unë kam humbur kontaktet me të. Që kur ka ikur s’kam reshtur. Kam arritur të kontaktoj shumë njerëz. Është shumë e rëndë dhe shumë e rrezikshme të thuhet që Eva nuk ka pranuar të vijë. Ne pamë sekuencat e kampit. A kuptoni se çfarë bëhet atje? Atje është një katrahurë e paparë. Shihni pamjet dhe thoni si duhet të mendojnë ata njerëz. Nuk është shumë kollaj, se jam përpjekur 7 vjet rresht. Nuk kam lënë njeri pa kontaktuar. Dëshira ime për ta marrë ka qenë e madhe, por garancia ishte e vogël. Ajo ka pasur frikë që të kthehej, por ndoshta ka pasur edhe presion brenda kampit. Ajo ka bërë një zgjedhje mes vetes dhe vëllait. Solli vëllain, se ishte në gjendje shëndetësore shumë të ligë, shumë të rënduar. Nëse Endri do kalonte dhe një muaj në atë kamp, nuk do të ishte më”, tha daja./ Balkanweb
