Policia e Tiranës ka hedhur poshtë denoncimet se i riu Andrea Bregu është në gjendje të rëndë shëndetësore në komisariatin nr.1 pas arrestimit në protestë.
Përmes një sqarim zyrtar, Policia e Tiranës shkruan se Bregu është arrestuar dy ditë më parë dhe ende po mbahet në komisariat pasi akuzohet për disa vepra penale, duke shtuar se ai ndodhet në gjendje shumë të mirë shëndetësore dhe se kjo gjë sapo është rikonfirmuar nga mjeku dhe në prezencë të dy përfaqësuesve të avokatit të popullit.
Sqarim i Policisë Tiranë: Në lidhje me një lajm të publikuar në rrjetet sociale se shtetasi me iniciale A.B., 20 vjeç, është në gjendje të rëndë shendetësore në ambientet e Komisariatit të Policisë Nr.1 ju sqarojmë se: Shtetasi A.B., 20 vjeç, i arrestuar me datë 11.12.2020, për veprat penale ““Organizimi dhe pjesëmarrja ne grumbullime e manifestime të paligjshme”, “Kundërshtimi i punonjësit të policisë së rendit publik”, “Pengimi i qarkullimit të mjeteve të transportit”, “Prishja e qetësisë publike”, “Shkatërrimi i pronës me zjarr” dhe ”Mosbindja ndaj urdhrit të punonjësit të policisë së rendit publik” dhe ‘’Mbajtja dhe përdorimi i lëndëve plasëse dhe piroteknike’’ ndodhet në gjendje të mirë shendetësore, kjo e konfirmuar para pak minutash nga mjeku i DVP Tiranë si dhe në prezencë të dy përfaqësuesve të avokatit të popullit. DVP Tiranë kërkon mirëkuptimin e medias që të mos publikojnë lajme të pakonfirmuara dhe fton qytetarët që të denoncojnë çdo rast të paligjshmërisë në Komisariatin Dixhital apo në numrin pa pagesë 112, duke u siguruar reagim të shpejtë e të paanshëm, kundrejt atyre që shkelin ligjin dhe cenojnë jetën eqytetarëve.
