TIRANË- Ndryshimet e papritura në qeveri kanë detyruar ligjvënësit të mblidhen me urgjencë për të miratuar dekretimin e dy ministrave të rinj, Olta Xhaçka dhe Niko Peleshi.
Në njoftimin e Parlamentit, parashikohet që seanca urgjente të zhvillohet të hënën, 4 janar 2021, në orën 17:00.
Kuvendi i nis punimet me sesionin e ri parlamentar më 18 janar, por emërimi i ministrave të rinj do të kalojë në një seancë të jashtëzakonshme.
Më 29 dhjetor, kryeministri Edi Rama njoftoi lëvizjet e fundit në kabinet. Gent Cakaj dha dorëheqjen nga Ministria e Jashtme, ndërsa në vend të tij, u emërua Olta Xhaçka që mbante postin e Ministres së Mbrojtjes. Tek Mbrojtja, Rama risolli në ekipin drejtues të socialistëve, Niko Peleshin, ish zv/kryeministër dhe ish-ministër i Bujqësisë.
