Kreu i Partisë Demokratike, Lulzim Basha është takuar sot me disa studentë ku ka dëgjuar nga afër problemet që ata hasin gjatë viteve të shkollimit, ku disa prej tyre të diktuar nga pamundësi ekonomike ndërpresin studimet për të siguruar të ardhura.
Në një postim në facebook, Basha shkruan se me 25 prill shqiptarët do të çlirojmë vendin nga pengmarrja, duke risjellë ndryshimin, duke shtuar se instrumenti më i mirë që kemi për të sjellë ndryshimin është politika në shërbim të njerëzve dhe motori i këtij ndryshimi është rinia.
“Ne do të mbulojmë 100% tarifat e studimit për studentët nga familje me të ardhura nën 640 mijë lekë dhe 50% të tarifës për ata nga familje me të ardhura mbi 640 mijë lekë. Ne do të mundësojmë 10 mijë praktika pune të paguara për një vit. Ne do të bëjmë gjithçka përmes arsimit profesional, apo bashkëpunimit me sipërmarrës që të rinjtë që nuk kryejnë studimet e larta të marrin një profesion. Ne do të vendosim taksën e sheshtë 9% dhe do të përmirësojmë klimën e investimeve në mënyrë që Shqipërinë ta shndërrojmë në vendin më tërheqës për investimet e huaja në Ballkan, kjo do të sjellë hapjen e mijëra vendeve të reja pune me paga të larta.
Do të stimulojmë dhe mbështesim sipërmarrjen e të rinjve dhe bizneset që hapin vende pune për të rinjtë”, deklaron Basha.
Postimi i plotë:
90% e studentëve shqiptarë vijnë nga familje me të ardhura të ulëta që nuk përballojnë dot tarifat e shumëfishuara të studimeve. Me disa prej tyre bisedova sot për të dëgjuar historitë personale të përpjekjeve për të përmbyllur me sukses shkollimin në kushtet e pamundësisë ekonomike. Punojnë në ndërtim, në transport, në bare e restorante, në call center për të mbuluar shpenzimet dhe shpeshherë u duhet t’i ndërpresin studimet.
Është e trishtueshme që pagat e profesioneve të tyre të nesërme janë më të ulëta se pagat që ata marrin në punët që bëjnë krahas studimeve.
Shumica dërrmuese e shqiptarëve janë të bindur tashmë se ka vetëm një rrugë : të bëhemi të gjithë bashkë e të ndryshojmë Shqipërinë. Më 25 prill ne të gjithë marrim një vendim: të çlirojmë vendin nga pengmarrja dhe ta ndryshojmë.
Shqiptarët nuk mund të mashtrohen më, nuk mund ta pranojnë më skllavërinë e një regjimi të korruptuar që po u merr frymën Mjaft është mjaft! Është koha për ndryshim.
Instrumenti më i mirë që kemi për të sjellë ndryshimin është politika në shërbim të njerëzve dhe motorri i këtij ndryshimi është rinia. Edi Ramës i intereson që ne ta humbim shpresën tek politika, i intereson propaganda që të gjithë janë njësoj, që ai të vazhdojë t’i përdorë taksat e shqiptarëve dhe pasuritë e këtij vendi për miqtë, klientët dhe qeveritarët e tij.
Beteja e 25 prillit nuk është thjeshtë dhe vetëm betejë midis forcave politike. Është betejë e gjithë shqiptarëve për të larguar njeriun e 8 viteve premtime të pambajtura, dështimeve, papunësisë, krizës ekonomike.
Pas 25 prillit ne do ta ndryshojmë këtë realitet. Ne nuk do të bëjmë mrekulli por nuk do të lëmë të ri apo të re të këtij vendi pa arsimin e lartë, për shkak të pamundësisë financiare.
Ne do të mbulojmë 100% tarifat e studimit për studentët nga familje me të ardhura nën 640 mijë lekë dhe 50% të tarifës për ata nga familje me të ardhura mbi 640 mijë lekë. Ne do të mundësojmë 10 mijë praktika pune të paguara për një vit. Ne do të bëjmë gjithçka përmes arsimit profesional, apo bashkëpunimit me sipërmarrës që të rinjtë që nuk kryejnë studimet e larta të marrin një profesion. Ne do të vendosim taksën e sheshtë 9% dhe do të përmirësojmë klimën e investimeve në mënyrë që Shqipërinë ta shndërrojmë në vendin më tërheqës për investimet e huaja në Ballkan, kjo do të sjellë hapjen e mijëra vendeve të reja pune me paga të larta.
Do të stimulojmë dhe mbështesim sipërmarrjen e të rinjve dhe bizneset që hapin vende pune për të rinjtë.
Bashkë do ta ndryshojmë Shqipërinë. Me energjinë dhe vendosmërinë e rinisë shqiptare ne do të sjellim ndryshimin, mundësi dhe shpresë për çdo qytetar shqiptar.
