Disa pacientëve po u shkaktohen akne masive me qelb në fytyrë, pas marrjes së vaksinës Moderna, gjë e cila është cilësuar si një efekt anësor i rrallë.
Në një shkrim të botuar të mërkurën nga Universiteti i Kalifornisë, San Francisko, studiuesit detajuan rastet e dy burrave që kërkuan kujdes mjekësor pasi morën dozën e parë ose të dytë të vaksinës.
Ata kishin enjtje të fytyrës, acarim lëkure, akne, por një kurë antibiotikësh dhe vajrash e zgjidhi problemin brenda 10 ditëve. Kjo nuk është hera e parë që marrësit e Moderna raportojnë reaksione të lëkurës. Në fillim të këtij viti, disa njerëz raportuan zhvillimin e “Covid Arm” – të përshkruar si lëkurë e acaruar ose e fryrë – shtatë deri në 10 ditë pasi ishin vaksinuar.
Ekspertët thonë se vaksina ka shkaktuar një reagim alergjik në trupat e të prekurve, duke bërë që numri i qelizave të bardha të gjakut të rritet dhe sistemi imunitar të fillojë një përgjigje, në formën e një skuqjeje dhe irritimi. Por ata thonë se këto reagime nuk janë dhe aq të rrezikshme dhe të shpeshta.
