Nëse do doni të festoni Krishtlindjet do duhet të jeni zotërues shumë i mirë i gjuhës e aq më tepër i gramatikës. Rregullat e reja të BE-se lidhur me terminologjitë e përdorura në festën e Krishtlindjeve janë cilësuar si absurde sidomos nga Italianët. Në emër të gjithëpërfshirjes, Komisioni Evropian shkon aq larg sa të “anulojë Krishtlindjet” duke na ftuar të mos përdorim shprehjen “periudha e Krishtlindjeve mund të jetë stresuese”, por të themi “festat mund të jenë stresuese”. Një dëshirë për të eliminuar krishterimin që shkon më tej me rekomandimin për të përdorur “emra gjenerikë” në vend të “emrave të krishterë”, prandaj, në vend të “Maria dhe Jozefi janë një çift ndërkombëtar”, duhet thënë “Malika dhe Giulio janë një çift ndërkombëtar”.
Komisioni Evropian dëshiron të fshijë të gjitha referencat për Krishtlindje së bashku me të gjitha termat gjinore, sipas një dokumenti të brendshëm të fundit të marrë nga e përditshmja italiane Il Giornale.
Sipas dokumentit “Bashkimi i Barazisë. Udhëzimet e Komisionit Evropian për Komunikim Gjithëpërfshirës”, në të ardhmen duhet të shmanget çdo referencë ndaj termave gjinore, si p.sh., “punëtor apo polic”. Kjo do të thotë se përdorimi i një përemri mashkullor si përemër i paracaktuar është i ndaluar së bashku me çdo përpjekje për të organizuar diskutime vetëm me një gjini të përfaqësuar (vetëm burra ose vetëm gra). Ndalohet gjithashtu përdorimi i “Miss or Mrs” që personi i referuar e kërkon në mënyrë eksplicite.
Nuk mbaron me kaq. Rregullat e reja nënkuptojnë se shprehja “Zonja dhe zotërinj”, për t’iu drejtuar publikut nuk lejohet në një konferencë. Në vend të kësaj, do të lejohet vetëm termi “të dashur kolegë”. Dëshira për të anuluar gjininë mashkullore dhe femërore arrin nivele paradoksale kur Komisioni shkruan se është e nevojshme të shmanget përdorimi i shprehjeve të tilla si “zjarri është shpikja më e madhe e njeriut”, por mënyra e drejtë për të thënë se “zjarri është shpikja më e madhe e njerëzimit.”
Komisioni Evropian është gjithashtu i prirur të “shmangë të konsiderojë se të gjithë janë të krishterë”, prandaj “jo të gjithë i festojnë festat e Krishtlindjeve (…) ne duhet të jemi të ndjeshëm ndaj faktit që njerëzit kanë tradita të ndryshme fetare”. Megjithatë, ka një ndryshim të madh midis respektimit të të gjitha feve dhe turpërimit ose fshirjes së rrënjëve të krishtera që janë baza e Evropës dhe e identitetit tonë.
Në një deklaratë të lëshuar në përgjigje të planit, Antonio Tajani, nënkryetar i partisë Forza Italia, shkroi se Komisioni Evropian në vend të kësaj duhet të fokusohet në respektimin e rrënjëve të krishtera të Evropës.
“Duke pasur parasysh parimin e përfshirjes, si duhen respektuar ndjeshmëritë e shumicës së stafit të Komisionit Evropian? Ndoshta këto direktiva duhet të ndryshohen për të respektuar rrënjët e krishtera të Bashkimit Evropian”, ka shkruar Tajani.
