ELBASAN–Nxënësit e shkollës 9-vjeçare “Europa” në qytetin e Elbasanit kanë bojkotuar rinisjen e mësimit gjatë ditës së sotme. Shkak për këtë është bërë fakti që në klasa mungon ngrohja, ndërsa prindërit dhe fëmijët kërkojnë një zgjidhje sa më parë për këtë situatë, që është prezente prej disa vitesh.
Prindërit e fëmijëve në shkollën “Europa”, që paradoksialisht vetëm emrin ka të tillë, shprehen se i veshin aq trashë fëmijët e tyre, saqë e kanë të pamundur që të shkruajnë gjatë momentit kur zhvillohet mësimi. ‘Duam ngrohëse, duam ngrohëse’, janë thirrjet e fëmijëve, që thonë se nuk mund të shkruajnë dot, edhe për faktin se dyert e dritaret qendrojnë të hapura. Në këtë shkollë marrin mësim më shumë se 430 nxënës.
“Mbajmë ndonjë rezistencë, por edhe ajo nuk ngroh, ka raste që bie edhe automati. Nuk shkruajmë dot në shkollë të veshur kaq trash, e gjithë shkolla nuk ka ngrohëse. Bashkia na kishte premtuar se do të vendoste kaldaja, por premtimi nuk u mbajt”, shprehen nxënësit.
Prindërit shprehen se për shkak të temperaturave shumë të ulëta në klasa, fëmijët kanë shfaqur edhe probleme me shëndetin e tyre, përfshirë kollë dhe ftohje.
“Na kanë prekur aty ku nuk mban më, ne rrimë të ngrohemi në shtëpi, fëmijët ti sjellim këtu. Jemi shumë të zhgënjyer”, shprehen prindërit, që po ashtu i janë bashkuar protestës.
