Kryeministri Edi Rama ka vizituar ditën e sotme fshatin Obot, në Shkodër i cili ka shfaqur më shumë probleme për shkak të përmbytjeve. Duke theksuar se reshjet e dendura të shiut do të përkeqësohen gjatë 24 orëve në vijim, Rama theksoi se situata po menaxhohet mirë ndryshe nga viti 2010 kur në pushtet ishte Partia Demokratike.
“24 orët e ardhshme priten të kenë reshje shumë intensive në zonën e Shkodrës, që krejt ndryshe nga përmbytja e frikshme e janarit 2010, kur me më pak reshje se këtë herë u evakuuan nga banesat mbi 10 mijë njerëz e mijëra krerë bagëti dhe qyteti u bllokua plotësisht nga uji, si rezultat i menaxhimit kriminal të kaskadës së Drinit e i bllokimit total të kanaleve kulluese, sot situata vazhdon të jetë nën kontroll dhe dëmet janë minimale, pikërisht sepse është punuar vitet e fundit me zhbllokimin e kanaleve kulluese si edhe menaxhimi i kaskadës po bëhet me profesionalizëm të lartë”, shkruan Rama në Facebook.
