Organizata Botërore e Shëndetësisë thotë se po punon me ekspertët për të gjetur një emër të ri për linë e majmunëve. Kjo vjen pasi më shumë se 30 shkencëtarë shkruan javën e kaluar për “nevojën urgjente për një emër jodiskriminues dhe jostigmatizues” për virusin dhe sëmundjen që ai shkakton.
Referimi i vazhdueshëm ndaj virusit si afrikan është edhe i pasaktë, edhe diskriminues, thanë ata. Një emër i ri që është sugjeruar nga shkencëtarët është hMPXV, por nuk dihet se çfarë mendon OBSH për këtë.
Organizata Botërore e Shëndetësisë tha gjithashtu se do të mbajë një takim urgjent javën e ardhshme për të përcaktuar nëse do ta klasifikojë shpërthimin si një emergjencë të shëndetit publik me shqetësim ndërkombëtar. Sëmundjet e tjera për të cilat kjo gjë është bërë në të kaluarën janë gripi i derrit, poliomieliti, Ebola, Zika dhe Covid.
Shefi i OBSH-së, Tedros Adhanom Ghebreyesus, tha: “Shpërthimi i lisë së majmunëve është i pazakontë dhe shqetësues. Për këtë arsye kam vendosur të mbledh Komitetin e Emergjencës sipas rregulloreve ndërkombëtare të shëndetit javën e ardhshme, për të vlerësuar nëse ky shpërthim paraqet një emergjencë të shëndetit publik me shqetësim ndërkombëtar”. Virusi është përhapur në një mënyrë të pazakontë në të gjithë botën muajt e fundit. Shpërthimet e mëparshme kanë qenë kryesisht të kufizuara në pjesë të Afrikës.
