Në konferencën për gazetarët kryetari i Partisë Demokratike ka thënë se qeveria nuk ka marrë asnjë masë për të përballuar valën e dytë të pandemisë në Shqipëri. Kryedemokrati ka rishpjeguar 4 hapat urgjentë që qeveria duhet të ndërmarrë për tejkalimin e krizës së shkaktuar, që i ka lënë shqiptarët në mëshirë të fatit.
Kryedemokrati Basha sërish ka vënë theksin te rritja e numrit të testimeve, rimbursimi i plotë për mjekimin në shtëpi kundër Covid, bonusi i premtuar dhe angazhimi i të gjithë mjekëve e infermierëve dhe shtimi i kapaciteteve spitalore.
“Kam marrë dhjetëra mesazhe të qytetarëve me raste të ngjashme refuzimi me të ndjerin Çekiri. Përgjigjja e vetme e qeverisë është një paradë më shumë nga kryeministri, pa asnjë të dhënë sa mjekë, sa infermierë do punojnë në atë spital. Jam personalisht në dijeni të rasteve me COVID të refuzuar nga sistemi shëndetësor. Nëse plani ynë do të ishte vënë në veprim do të kishim funksionale kapacitete për të pritur të prekurit me covid dhe mundësi që të përballonim të tjerë. Pacientëve u duhet të presin shumë ditë për të bërë tamponin. Babai i një kolegut tuaj ka pritur 6 ditë me simptoma për të bërë tamponin. Shumica dërrmuese e qytetarëve nuk mund ta përballojnë koston e paketës së trajtimit me paratë e tyre. Qeveria, asnjë masë për të përballuar valën e dytë. Vala e dytë që sapo ka nisur e gjen të papergatitur këtë qeveri dhe Edi Ramën për ta përballuar Prej 4 javësh kërkoj të ndërmerren 4 hapa të thjeshtë. 1. Minimumi 2500 testime në ditë. 2. Mbulimi i kostove të paketës së trajtimit të COVID, të merret përsipër nga shteti. 3. Mobilizimi total i sistemit, për t’u përballur me çdo nivel të trajtimit të të sëmurëve.4. Bonusi 1000 € për mjek, 500 € për çdo infermier.”
