Partizani humbi pjesën dërrmuese të titullarëve të sezonit të shkuar dhe njëri prej tyre ishte edhe mbrojtësi Esin Hakaj, i cili u transferua në Ligën e Dytë turke te Samsunspori. Shkodrani ka qenë lojtari më i aktivizuar vjet me “demat”, ku bëri edhe një përparim të madh. Me trajnerin Daja, Esin Hakaj u rrit shumë në linjën e majtë, por aventura e tij e parë jashtë vendit duket se po ngec. Samsunspori, me ardhjen e stafit të ri teknik, nuk e ka në plane, pasi ka afruar alternativa të tjera.
Partizani po e monitoron me vëmendje situatën e ish-mbrojtësit dhe nuk përjashtohet mundësia që ai të rikthehet sërish te “demat”, duke e marrë në formë huazimi nga klubi turk ose duke e marrë përfundimisht, nëse Samsunspori e prish kontratën me 24-vjeçarin.
Në fund të qershorit Esin Hakaj firmosi kontratë 3-vjeçare me opsion rinovimi edhe për një sezon me Samsunsporin. Qëndrimi i mbrojtësit te klubi turk i ligës së dytë duket thuajse i pamundur, pasi këtë gjë dje e ka bërë të ditur edhe presidenti klubit, Yuksel Yilirim.
Presidenti i Samsunsporit ka deklaruar për mediat vendëse se është e vështirë që Esin Hakaj të qëndrojë te klubi i tij, gjithsesi fjalën përfundimtare e ka trajneri dhe më pas drejtuesit do të merren me mënyrën e sistemimit të shkodranit në ndonjë klub tjetër, ku ideja e huazimit është përfolur prej ditësh. “Esin Hakaj e ka të vështirë të qëndrojë, por kjo varet nga vendimi i trajnerit.
Ne duhet ta respektojmë mendimin e tij, pasi është ai që i stërvit për ditë lojtarët”, u shpreh dje presidenti i Samsunsporit për mediat turke.
“Panorama Sport” ka mësuar se drejtuesit e Partizanit janë vënë në lëvizje duke krijuar kontaktet e para me palën turke në mënyrë që të gjejnë gjuhën e përbashkët për rikthimin e Esin Hakajt.
