ITALI– Ekspertët italianë kanë vënë në alarm vendin për shkak t zbulimit të një mutacioni të ri të Covid-19. Presidenti i Shoqatës Italiane të Virologjisë, Arnaldo Caruso është shprehur për mediat vendase se mutacioni që shpërtheu nga Britania e Madhe, nuk është i vetmi që ka qarkulluar në botë pas përhapjes së pandemisë së Covid-19.
Caruso pretendon se që prej muajit gusht qarkullon dhe në Itali një formë e koronavirusit, shumë e ngjashme me variantin anglez. Ai shtoi se varianti Italian u arrit të zbulohej fare rastësisht, gjatë vëzhgimit të një ngarkese të pazakontë virale tek një pacient që kishte vuajtur nga Covid-19 në muajin prill. Edhe pas shërimit të tij, tamponet e kryer mbi këtë individ vazhdonin të dilnin pozitivë dhe tregonin se kishte ngarkesë shumë të madhe virusale.
“Ai e paraprin shtamin e zbuluar në muajin shtator në Britaninë e Madhe. Nuk qenkan vetëm variantet e ri britanike dhe afrikane të koronavirusit ato që qarkullojnë nëpër Europë. Virusi Italian është zbuluar në Brescia, por ndryshe nga varianti anglez, ai italian, ka pësuar në këtë proteinë edhe një mutacion të dytë, ç’ka bën që të dallojë disi nga virusi pandemik të cilin tashmë e njohin të gjithë. Kur vendosëm të bënim sekuencimin e virusit për të kuptuar përse zgjati kaq shumë situata e pacientit në fjalë, kuptuam se sapo kishim identifikuar një variant të ri të tij,”- shpjegoi virologu.
Mutacioni i koronavirusit që u identifikua për herë të parë në Mbretërinë e Bashkuar, u zbulua më pas edhe në vende të tjera në Evropë, si Holandë, Danimarkë, Itali, Singapori dhe Gjermani. Së fundmi dhe në Spanjë dhe Suedi. Deri më tani mbi 40 vende, përfshirë Turqinë dhe ato evropiane, kanë pezulluar trafikun ajror me Mbretërinë e Bashkuar. Disa prej tyre, përfshirë Francën, mbyllën edhe kufirin e tyre tokësor.
