Pak ditë pas kritikave nga kryeministri Edi Rama, duket se ka nisur ‘fshesa’ në Ujësjellësin e qytetit të Vlorës. Raportohet se ditët që lamë pas janë shkarkuar deri më tani 30 punonjës të Ujësjellësit.
Shkarkimet janë firmosur nga drejtuesja e re e institucionit Elona Hodaj. Mësohet se priten ende lëvizje të punonjësve të cilët punojnë në pozicione të ndryshme pa kualifikimin përkatës. Kujtojmë këtu që pak ditë më parë, kryeministri Edi Rama gjatë një mbledhje publike me kryebashkiakët e vendit, e shpalli Bashkinë e Vlorës si kampione për shpërdorimin e fondeve dhe keqmenaxhim e humbjeve në sektorin e Ujësjellësit.
Madje Rama tha edhe se në këto ndërmarrje ka persona të punësuar të cilët marrin rroga dhe nuk janë fare në Shqipëri.
“Çfarë profile dhe kapacitetesh kanë ndërmarrjet e ujësjellësit. Sa janë në profilin e tyre punonjësit e ujësjellësave. Të merrni masat vetë përpara se këto pasqyra të tregojnë gjëra që do mbeten në historinë e humorit dhe satirës shqiptare. Me këtë tabelë që është këtu të para të humbjeve duke filluar nga Vlora dhe duke shkuar më poshtë, ju e dini vetë se çfarë bëni. Por aty përgjegjësia duhet të jetë e drejtëpërdrejtë, nga drejtuesit deri tek menaxherët. Duhet të jetë e menjëhershme. Rekrutimet për drejtuesit nuk duhet të bëhen më. Do kërkojmë ndihmën e partnerëve tanë për të bërë rekrutimet serioze. Këto nuk janë mall i huaj të cilit prej 30 vitesh i bie me top duke shpërdoruar mandatin e dhënë nga qytetarët. Këto janë ndërmarrje dhe do funksionojnë sit ë tilla. Nuk janë zyra punësimi që nuk duan të punojnë dhe të marrin një rrogë dhe nuk janë fare në Shqipëri” – tha Rama.
