TIRANË– Deputeti i Partisë Demokratike Edi Paloka ka deklaruar se e ka firmosur peticionin që është bërë online kundër qëndrimeve të ambasadores së Shteteve të Bashkuara në Tiranë, Yuri Kim. I ftuar në “Të paekspozuarit”, Paloka hodhi poshtë akuzat duke thënë se peticioni është bërë nga Sali Berisha, por shtoi se e mbështet. Ai tha se vetë e kishte firmosur atë peticion me bindje të plotë.
“Nuk është e vërtetë që e ka bërë Berisha. Berishës as nuk i ka shkuar në mendje. Se ça ka Berisha dhe se çfarë kemi ne, e kemi thënë hapur dhe e themi çdo ditë, nuk kemi nevojë ne të bëjmë peticione. Berisha nuk është kundër këtij peticioni është pro, por nuk e ka bërë ai. Unë e kam firmosur këtë peticion. E kam firmosur, por nuk e kam bërë unë. Ai peticion e lexove me kujdes, nuk kishte asnjë lajthitje dhe më pëlqeu, jam dakord se ishte njësoj sikur e kisha bërë unë. Por nuk kemi lidhje fare me atë peticion. Mendojmë plotësisht ashtu edhe e firmosa me bindje”, tha Paloka në emisionin “Të paekspozuarit,”- tha Paloka.
Në rrjetet sociale është duke u shpërndarë një peticion kundër Kim. Përmes tij i kërkohet Departamentit Amerikan të Shtetit që t’i ndalojë ambasadores ndërhyrjen në punët e brendshme të vendit. Partia Socialiste e ka konsideruar një turp.
