Vlorë- Kryeministri Edi Rama ka inspektuar sot punimet për Lungomare 2 në Vlorë. Kryebashkiaku i Vlorës, Dritan Leli ka bërë një prezantim të punës së deritanishme, ndërsa theksoi se vija bregdetare në atë zonë i ngjante Karaibeve.
“Këtu është fillimi i pjesës së re të investimit. Është Lungomare 2. Është 1 km. Shëtitorja thuajse ka përfunduar në 95% të saj. Kanë nisur të mbuillen pishat e reja. Do vazhdojë deri në fund fare ku e gjithë shëtitorja do të jetë e mbuluar me pisha. Ka funksionuar shumë mirë sistemimi i plazhit, me pjesën dekorative me atë natyrale. Kemi rreth 6 mijë metra katrore plazhe të krijuara, pavarësisht se në disa raste njerëzit ankohen; jo s’do kemi më plazhe, por beton’. S’ka pasur asnjë standard të tillë plazhe publike. Standard plazhi me 5 yje. U tha se plazhi do të mbushej nga inertet, por shikoni si është bërë. Plazhi është kthyer si në Karaibe”, tha Leli.
Kreu i qeverisë shoqërohej nga deputeti për qarkun e Vlorës, Damian Gjiknuri.
