Kosovë- Ish-komandanti i UÇK-së Rexhep Selimi, njëherësh kreu i grupit parlamentar të Vetëvendosjes pritet të niset pas pak minutash drejt Hagës.
Lajmin e ka bërë vetë Selimi në një postim që ka bërë në rrjetet sociale, ku njofton se është ftuar nga Gjykata Speciale pasi për të është konfirmaur nja aktakuzë. Ai pritet që të niset drejt Hagës sot në orën 09.00.
“Të nderuar miq, bashkëluftëtarë, qytetarë e bashkëkombas të mi! Sonte në orët e mbrëmjes jam njoftuar nga Dhomat e Specializuara se ka një aktakuzë të konfirmuar për mua. Prandaj, po e ndjej për obligim t’ju njoftoj se nesër do të udhëtoj për Hagë (Holandë) që të përballem me këtë sfidë që i është vënë Ushtrisë Çlirimtare të Kosovës, para së gjithash. Unë po shkoj me kokën lart dhe kurdo që kthehem do kthehem po ashtu me kokën lart sepse isha, jam dhe do të jem ushtar i Ushtrisë Çlirimtare të Kosovës për të cilën jam i gatshëm të jap gjithçka nga vetja ime. Ideali i asaj ushtrie të lavdishme është mbi mua, mbi këdo, mbi gjithçka. Mirë u takofshim në fitoren e Ushtrisë Çlitimtare të Kosovës! Kam ditur e do të di gjithmonë ta mbroj lirinë e popullit, shtetin e Kosovës dhe UÇK-në e lavdishme”, shkroi dje Selimi.
Sakaq, ditën e djeshme, në orën 06:00, efektivët e EULEX kanë rrethuar shtëpinë e ish-kryeparlamentarit të Kosovës, Jakup Krasniqi. Pasi kanë izoluar gjithë familjen në një dhomë në katin e parë, për plot 9 orë kanë kontrolluar çdo cep të shtëpisë së tij dhe më pas e kanë arrestuar.
Dhomat e Specializuara në Hagë kanë konfirmuar aktakuzën kundër shefit të Grupit Parlamentar të Lëvizjes Vetëvendosje, Rexhep Selimi.
