Erida, policja shqiptare në Florida tregoi në një intervistë për “Goodmorning Albanians” në Euronews Albania se që prej vitit 2004 që është transferuar në Shtetet e Bashkuara të Amerikës ka përjetuar 3 uragane.
Ajo u shpreh se kjo lloj fatkeqësie natyrore mund të parashikohet dhe në varësi të nivelit të uraganit, nga 1 deri në 5, rritet dhe shqetësimi për situatën.
Brenda javës Erida tha se ka bërë 107 orë punë dhe kështu do të vazhdojë, me po të njëjtin ritëm derisa gjendja e emergjencës të mbarojë dhe qytetarët të jenë të gjithë të sigurt.
“Për ne pasi era kaloi 45 milje në orë, gjithë policia u tërhoq nga rruga. Ishte shumë e vështirë për ne, pasi ne jetojmë në një nga 6 qytetet më të mira në Amerikë, kështu që përgjigja e policisë, përgjigja që i jepnim publikut ishte shumë e shpejtë dhe për ne ishte gjëja më e vështirë kur i dëgjonim për çfarë kishin nevojë dhe s’kishim asgjë që mund të bënim,” – u shpreh efektivja.
Për Eridën, momenti më i vështirë ishte pikërisht tani, pas përfundimit të uraganit Ian dhe përballja me realitetin.
