Tiranë- Ditën e sotme, Presidenti Meta ka kujtuar ditën e rëndësishme të Trashëgimisë Kulturore shqiptare, Polifonia shqiptare bën 15 vite që është pjesë e listës së “Kryeveprave të trashëgimisë së njerëzimit”.
Përmes një urimi të përzemërt, Meta kujtoj korifejtë e polifonisë të cilët i dhanë vlera të jashtëzakonshme kryeveprës së trashëgimisë së vendit tonë në UNESCO.
POSTIMI I METËS
Sot kam kënaqësinë dhe krenarinë e veçantë të përshëndes 15-vjetorin e përfshirjes së këngës polifonike shqiptare në listën e “Kryeveprave të trashëgimisë të njerëzimit”, mbrojtur nga UNESCO!
Urimi më i përzemërt shkon për të gjithë korifejtë shqiptarë të polifonisë, të cilët në rolet e “Marrësit”, “Prerësit”, “Hedhësit” dhe “Isos” së kësaj kënge, kanë mbajtur gjallë dhe transmetuar këtë traditë të shquar kombëtare, brez pas brezi.
Përshëndes kontributin e grupeve krijuese, bartësve, interpretuesve, rapsodëve, studiuesve dhe artistëve të folklorit e kulturës popullore!
Ky akt vlerësimi i UNESCO-s reflekton shkallën e lartë të cilësisë së trashëgimisë sonë shpirtërore kombëtare, identitetin e spikatur kulturor dhe talentin e bartur në vite të genit shqiptar.
Gjuha, kënga polifonike dhe identiteti i shqiptarit kanë qenë dhe do të jenë përherë një e të pandarë! Lavdi përjetë këngës polifonike!
