Lulzim Basha u zgjodh për herë të parë kryetar i Partisë Demokratike në korrik 2013. Zyrtarisht Basha e ka drejtuar PD nga 15 shtatori 2013 deri më 21 mars 2022.
Në 2913,kur ishte kryetar i Bashkisë Tiranë, Basha fitoi garën për kryetar përballë Sokol Olldashit, që ishte ministër i Transportit. Në zgjedhjet brenda PD morën pjesë rreth 41 500 mijë anëtarë. 80% votuan për Bashën, kurse Olldashi mori më pak se 20%.
Në shifra konkrete, Basha mori 33 220 vota, Olldashi vetëm 8 060 vota. Olldashi pranoi humbjen duke thënë se “procesi ishte tërësisht i deformuar”.
Ai akuzoi Berishën se ka ndërhyrë në zgjedhje ndonëse se kishte dhënë garanci se nuk do ta bënte këtë. Basha ishte bërë pjesë e PD pak para zgjedhjeve të korrikut 2005, që risollën Berishën në pushtet pas dorëheqjes si president në korrik 1997. 47-vjeçari i diplomuar për drejtësi në Holandë, iu bashkua PD në janar 2005.
Ai u angazhua si pjesë e Komitetit të Orientimit të Politikave, një prej gjetjeve që ndihmuan PD në fitore.
Basha kandidoi për deputet në Tiranë dhe fitoi përmes sistemit të votimit direkt. Në kabinetin e parë të Berishës, Basha u emërua ministër i Transportit, post që e mbajti për 2 vite (Shtator 2005 – Prill 2007).
Në prill 2007, u emërua ministër i Jashtëm, detyrë që e mbajti deri në shtator 2009. Prej shtator 2009 deri në zgjedhjen si kryetar i Bashkisë Tiranë, Basha shërbeu si ministër i Brendshëm (shtator 2009 – prill 2011).
Basha fitoi përballë Edi Ramës në zgjedhjet lokale të maj 2011 me një diferencë prej vetëm 81 vota. Në përfundim të mandatit nuk rikandidoi për mandat të dytë. PD në drejtimin e Bashës humbi zgjedhjet parlamentare të qershor 2017, ku PD mori vetëm 28.85% kurse PS 48.34%. Pas humbjes, Basha u rizgjodh kryetar në 2017 pasi ngriu pozicionin e tij si lider i demokratëve.
Në zgjedhjet e korrik 2017, Basha fitoi me mbi 91% të votave përballë Eduart Selamit. Nga 59 mijë vota në total, Basha mori 53 931 vota, kurse Selami vetëm 5 136 vota. Në zgjedhjet parlamentare 2021, pas 8 vite në opozitë, PD humbi sërish përballë PS. Në drejtimin e Bashës, PD mori 39.43%, kurse PS me Edi Ramën mori mandatin e tretë me 48.67% të votave. Pavarësisht kësaj, Basha fitoi sërish zgjedhjet brenda PD. Në qershor 2021, Basha fitoi me shumicë dërrmuese.
Nga rreth 41 mijë vota, Basha mori 40 684 vota, Agron Shehaj 6 038 vota, Edit Harxhi 983 vota dhe Fatbardh Kadilli, 781 vota. Shpallja ‘non grata’ e ish-kreut të PD, Sali Berisha dhe më pas pezullimin e tij si pjesë e grupit parlamentar të PD, bëri që Basha nga ‘i besuari’ i Berishës të kthehej në kundërshtarin e tij brenda partisë. Basha u detyrua të jepte dorëheqjen pas gati 9 vitesh në drejtimin e PD për shkak të rezultatit dërrmues në zgjedhjet e pjesshme të 6 marsit. Kandidatët e PD dolën të tretën në 5 nga 6 bashkitë ku u votua për kryetarin e ri.
